தப்லீக் ஜமாஅத்தின் கொள்கைகள்.

தப்லீக் ஜமாஅத்தின் கொள்கைகள்.

“நபிகளார் ஸல்லல்லாஹு அலைஹி வஆலிஹி வசல்லம் அவர்கள் மறைவான சங்கதிகளை அறிவார்களென்று நம்புவது சுத்தமான ஷிர்க்காகும். ஸல்லல்லாஹு அலைஹி வஆலிஹி வசல்லம் அவர்களின் மௌலிதை ஓதுவது ஹிந்துக்களின் நிகழ்வுகளுக்கு நிகரானது. எந்த விதத்திலும் மௌலித் மீலாது நடத்துவது கூடாது. ஸல்லல்லாஹு  அலைஹி வஆலிஹி வசல்லம் அவர்களின் பரிசுத்த ரவ்ழா ஷரீபை தரிசிப்பதற்காக மட்டும் போவது ஷிர்க்காகும்.” போன்றவை தப்லீக் ஜமாஅத்தின் உண்மையான கொள்கைகளாகும். 

தப்லீக் இயக்கமானது வஹ்ஹாபிச இயக்கமாகுமென்று நாம் ஏன் சொல்கின்றொம்? என்பதற்கான காரணத்தினை அறிந்திட ஆவலுள்ளவர்கள் “இரு வழிக்கு ஒரு வழிப் பயணனம்” என்ற நமது நூலைப் படித்துப் பாருங்கள். அத்தோடு தப்லீக் ஜமாஅத்தின் பிந்திய வழிகெட்ட பாதையினை தெளிவாகவும் விரிவாகவும் படிக்க விருப்பம்கொள்வோர் சூபி ஷெய்கு நாயகம் அவர்கள் தொகுத்தளித்த நூற்களைப் படித்துப் பாருங்கள். (சூபி மன்ஸில் என்ற இணைய தளத்தில் இப்புத்தகங்களை தரவிறக்கம் செய்துகொள்ள முடியும்.)

இது வரையில் சொல்லப்பட்ட இயக்கங்கள்தான் இலங்கைக்குள் புகுந்த பிரபல அமைப்புக்களாகும். இவ்வியக்கங்களின் கொள்கைகளைப் படிக்கும்போது அருமை நாயகம் முஜ்தபா ஸல்லல்லாஹு அலைஹி வஆலிஹி வசல்லம் அவர்களை நிந்தித்து அவமதித்து அசிங்கப்படுத்தி வைப்பது ஒன்றுதான் இந்த அமைப்புக்களின் அடிப்படை அம்சமாக இருக்கிறதென்பதைப் புரிந்துகொள்ள முடிகிறது. இவற்றின் வருகையினைத் தொடர்ந்து இலங்கை முஸ்லிம்களின் பாரம்பரிய கொள்கைக் கோட்பாடுகளில் பாரிய சரிவு ஏற்பட்டது. பெயரளவில் இவர்களெல்லாம் மாறுபட்டிருந்தாலும் கொள்கையளவில் ஒன்றுபட்டிருந்தார்கள் என்பதே உண்மை.

இலங்கையில் முதன் முதலாக “தர்வேஷ்” என்பவரால் உருவாக்கப்பட்ட அமைப்பு முதல்தொட்டு வெளிவந்த ஜமாஅத்தே இஸ்லாமி, தப்லீக் ஜமாஅத் ஆகிய அமைப்புக்களின்  கொள்கைள் இஸ்லாமிய கொள்கைகள் அல்ல. மாறாக வழிகெட்ட வஹ்ஹாபிசக் கொள்கைகளென்று 1938ஆம் ஆண்டிலிருந்து இன்று வரைக்கும் சொல்லப்பட்டுக்கொண்டே வருகிறது. அதனால் வீணான விதண்டாவாதங்கள் வளர்ந்ததே தவிர அவ்வணியினர்களில் உண்மையை யாரும் விளங்கிக்கொண்டதாக இல்லை. மாறாக நாங்கள் சரியான நிலைப்பாட்டில்தான் இருக்கின்றொம்.

நீங்கள்தான் பிழையான நிலைப்பாட்டில் இருந்துகொண்டிருக்கின்றீர்கள் என்று நம்மைப் பார்த்து குரல் கொடுத்துக்கொண்டிருக்கின்றார்கள். என்றொ ஒரு நாள் தீமை ஒழிந்து உண்மை நிலை நிலைக்கும். இது சத்தியம்.

ஷீஆக்கள்

 இவர்கள் வழிகேடர்கள் என்பதில் நம்மிடம் மாற்றுக்கருத்து இல்லை. ஷீஆக்களும் அவர்தம் கொள்கைகளும், அஹ்லுல் பைத்துக்களை அன்பு கொள்வோம் என்ற இரு நூற்களைத் தொகுத்து ஷீஆக்கள் யார்? என்பதை நாம் தெளிவுபடுத் தியுள்ளோம். 

காதியானிகள்

 இதுவொரு இஸ்லாமிய இயக்கமல்ல என்பது நமது நிலைப்பாடு. அதனால் அவர்கள் பற்றி இவ்விடத்தில் கருத்துக்கூற நாம் விரும்பவில்லை.

இலங்கையில் தப்லீக் ஜமாஅத்.

இலங்கையில் தப்லீக் ஜமாஅத்.

தப்லீக் ஜமாஅத்தின் ஸ்தாபகர் மௌலவி இல்யாஸ் 1885ல் காந்தலவி என்னும் ஊரில் பிறந்து 13-07-1944ல் டில்லியில் மரணமானார். 1920ல் தப்லீக் ஜமாஅத்தை மேவாத் என்ற ஊரில் உண்டாக்கினார். இவரின் கப்ர் டில்லி மர்கஸ் பள்ளி வாசலின் உட்பகுதியில் பாதுகாப்பாக இப்பொழுகூட பராமரிக்கப்படு வருகின்றது.

தப்லீக் ஜமாஅத் என்னும் புதிய சரக்குக் கப்பல் 1948ல் காலியைச் சேர்ந்த அல்ஹாஜ் முஹம்மது புகாரி என்ற தனவந்தரினால் இலங்கைத் துறைமுகத்தில் நங்கூரமிட்டது. இந்தக் கப்பலுக்கு முந்திய கப்பல்களின் மாலுமிகள் யார்? அது சுமந்துள்ள பொதிகளின் பெறுமதிகள் என்னவென்பதை இந்நாட்டு உலமாக்கள் கண்டு பிடித்திருந்ததார்கள். அதற்கெதிராக உழைத்தார்கள். குரல் கொடுத்தார்கள். வழிகேடர்கள் என்று எழுதி வைத்தார்கள். ஃபத்வாக்கள் வெளியிட்டார்கள் என்றால் தப்லீக் ஜமாஅத்தின் உண்மை நிலையினை மட்டும் இந்நாட்டு உலமாக்கள் கண்டுகொள்ளாது அவர்களை அங்கீகரித்து அவர்களின் வளர்ச்சிக்கு பங்களிப்புச் செய்ததற்கான காரணம் இதுதான் என்பதை இறக்குமதியும் குழப்பமும் என்ற நூல் பின்வருமாறு தெளிவாக எடுத்துரைத்திருக்கிறது. 

(1953ல் டில்லியில் இருந்து மௌலானா ரஹ்மதுல்லாஹ் (டில்லி ஸாஹிப்) என்பவர் இலங்கைக்கு வந்தார். அப்பொழுது பஹ்ஜதுல் இப்ராஹீமிய்யா கல்லூரி அதிபர் மர்ஹும் அல்ஆலிமுல் ஃபாழில் அல்ஹாஜ் அல்உஸ்தாத் அப்துல் ஹமீது ஹழ்ரத் அவர்களின் முயற்சியில் காலி கழுவல்லையில் இஜ்திமாவொன்று ஏற்பாடு செய்யப்பட்டது. 

அந்த இஜ்திமாவில் அல்ஆலிமுல் ஃபாழில் அல்உஸ்தாத் அப்துல் ஹமீது ஆலிம் ஹழ்ரத் (கண்டி அக்குரனை அலவத்தகொடை மறைவு 1971) அல்ஆலிமுல் ஃபாழில் அல்உஸ்தாத் அப்துல்லாஹ் ஹழ்ரத் (காலி தடாலி மறைவு 1955) அல்ஆலிமுல் ஃபாழில் அல்உஸ்தாத் முஹம்மது அஜ்வாத் ஆலிம் ஹழ்ரத் (வெலிகாமம் புதுத்தெரு மறைவு 1986) அல்ஆலிமுல் ஃபாழில் அல்உஸ்தாத் அப்துஸ் ஸமத் ஆலிம் ஹழ்ரத் (உடுகொட ருக்கஹவில  மறைவு 1996) ஆகிய ஐந்து பேரும்இ மௌலானா ரஹ்மதுல்லாஹ் அவர்களிடம் தப்லீக் ஜமாஅத்தின் கொள்கைகோட்பாடு பற்றி வினவ, தப்லீக் ஜமாஅத்தின் உஷுல் நான்கு மத்ஹபுகளில் ஒன்றைப் பின்பற்றவேண்டும். நான் ஹனபி மத்ஹபைச் சார்ந்தவன். நீங்கள் இலங்கையில் ஷாபிஈ மத்ஹபைச் சார்ந்தவர்கள். அஷ்அரிய்யா, மாதுரூதிய்யாவை அகீதாவில் பின்பற்றவேண்டும் என்று அவர் சொன்னார்.) பக்கம்: 84,85. 

இதன் பின்னர்தான் இலங்கையில் உள்ள தப்லீக் ஜமாஅத்தில் வஹ்ஹாபிஷம் இல்லையென்று அல்உஸ்தாத் அப்துல் ஹமீத் ஹழ்ரத் அவர்களும் தப்லீக் ஜமாஅத் தரீக்காவாகுமென்று அல்உஸ்தாத் அப்துஸ் ஸமத் ஹழ்ரத் அவர்களும் கூறியுள்ளனர். 

கவனிக்க வேண்டிய குறிப்பு

இலங்கை ஜமாஅதுத் தப்லீகின் பயான், தஃலீம்களில் விசுவாசக் கொள்கையிலோ செயலாற்றும் விஷயங்களிலோ ஷரீஅத்திற்கு விரோதமாக (ஷாபிஈ மத்ஹபின் தீர்புக்கு விரோதமாக) இருந்தால் அவற்றைத் தடை செய்து கொள்ள வேண்டும் என்றதொரு குறிப்பினையும் சங்கைக்குரிய அல்-உஸ்தாத் அப்துஸ் ஸமத் ஆலிம் பெருந்தகை அவர்கள் குறிப்பிட்டுக் கூறியுள்ளார்கள். (இலங்கை முஸ்லிமின் மத்ஹப் பக்கம் 35)

தப்லீக் ஜமாஅத்தினை எதிர்க்காமல் அவர்களுக்கு பக்கபலமாக இந்நாட்டு உலமாக்கள் இருந்தமைக்கான  காரணத்தினை யாரிடமிருந்து நேரடியாக கேட்டறியலாம் என்று நாம் யோசித்துப் பார்த்தோம். மேற்குறிப்பிட்ட அறிஞர் பெருமக்களிடம் கல்வி பயிண்றவர்களில் இன்று யார் யார் இருக்கின்றார்கள்? என்று தேடினோம். அதனடிப்படையில் கொழும்பு,காலி,அட்டாளைச்சேனை, அக்கரைப்பற்றுஇ ஏறாவூர், மன்னார் போன்ற பிரதேசத்து மூத்த பஹ்ஜிகளை இதற்கென்று தொடர்புகொண்டு மேற்சொன்ன வினாவை அவர்களிடம் கேட்டோம். 

அதற்கு, (நாங்கள் மத்ஹபுகளைப் பின்பற்றவேண்டும் என்று வலியுறுத்துகின்றொம். அதனடிப்படையில் நாம் ஹனபி மத்ஹபை முழுமையாக பின்பற்றுகின்றொம். அத்துடன் சூபிச தரீக்காக்களை ஆதரிக்கின்றொம். அந்தவகையில் நாங்கள் சிஷ்திய்யா, ஸாபிரிய்யா, நக்ஷபந்திய்யா போன்ற தரீக்காக்களை பின்பற்றுகின்றொம் என்று தப்லீக் ஜமாஅத்தினர்கள் பிரசாரம் செய்தார்கள். நேரடி சந்திப்புக்களிலும் இதனை ஊர்ஜிதம் செய்ததை நாம் எமது கண்காளால் கண்டோம். செவிகளால் செவியுற்ரறொம்) என்று அவர்கள் எமக்கு பதில் கூறினார்கள்.

இதுவொன்றுதான் அன்றிருந்த எங்களது மதிப்புக்குரிய ஆசான்கள் தப்லீக் ஜமாஅத்திற்கு ஆதரவு நல்கியதற்கான காரணமாகும் என்று கூறிவிட்டு இப்படியும் ஒரு செய்தியைச் சொன்னார்கள். அதாவது, (இன்றிருக்கும் தப்லீக் ஜமாஅத்தினர்கள்போன்று அன்றிருந்தவர்கள் இருந்திருப்பின் நிச்சயமாக தப்லீக் கூட்டத்தினை அவ்வுலமாக்கள் நிராகரித்திருப்பார்கள்) என்று ஆவேசத்துடன் நாம் தொடர்பு கொண்ட அன்றைய மாணவர்கள் இன்றைய மூத்த உலமாக்கள் நம்மிடம் தெரிவித்தார்கள்.

தப்லீக் ஜமாஅத்தின் டில்லி ஸாஹிபை நேரில் சந்திக்கச் சென்றவர்களில் அல்உஸ்தாத் அப்துல்லாஹ் ஆலிம் பெருந்தகையும் ஒருவராகும். கிழக்கிலங்கை அரபிக் கல்லூரியின் (1954) ஸ்தாபகரான இவர், அக்கரைப்பற்றைச் சேர்ந்த தன்னுடைய மாணவர்களில் ஒருவரான அல் ஆலிமுல் ஃபாழில் அல்உஸ்தாத் புகாரி (மறைவு 1992) ஆலிம் பஹ்ஜி என்பவரிடம், தப்லிக் ஜமாஅத் பார்வைக்கு நன்றாக இருக்கிறது. இதில் வஹ்ஹாபிசம் இல்லாதிருக்க அல்லாஹ் துணை இருக்கவேண்டும் என்று சொன்னதாக அவரின் சகோதரர் ஒருவர் நம்மிடம் சொன்னார். இவரும் பழைய பஹ்ஜிகளில் ஒருவராகும்.

அல்ஆலிமுல் ஃபாழில் அஷ்ஷெய்குல் வாஸில் அஷ்ஷெய்கு அப்துல் காதிர் ஸஷுபி ஸித்தீக்கி கத்தசல்லாஹு சிர்ரஹுல் அஸீஸ் (மறைவு 1982) நாயகம் அவர்கள் ஜமாஅத்தே இஸ்லாமிய இயக்கம் பற்றி எழுதிய ஃபத்வாவினை அங்கீகரித்துவிட்டு “தப்லீக் ஜமாஅத்தில் வஹ்ஹாபியத்தின் விஷக் கிருமிகள், தப்லீக் என்றால் என்ன? அல் முஹன்னதின் அண்டப் புளுகு, தப்லீக் ஜமாஅத்தில் ஏன் சேரக்கூடாது? காதியானி தேவபந்தி சம்பாசனை, தன்னறிவில்லா தக்க பதிலுக்கு தகுந்த விதமாக தலையில் தட்டு, புலியைக் கண்டு ஓட்டம், சுவர்க்க நகைகளா? அல்ல நரக விலங்குகள், உலமாக்களின் உண்மை ஃபத்வா, இழ்ஹாருல் ஹக்இ இல்யாஸி தப்லிக் ஜமாஅத் பற்றி உலமாக்களின் உண்மைத் தீர்ப்பு”  ஆகிய நூற்களைத் தொகுத்து தப்லீக் ஜமாஅத்தும் வழிகெட்டதொரு நவீன இயக்கமாகுமென்று சொன்னதை உங்கள் ஆசான்கள் ஏன் கண்டுகொள்ளவில்லையென்றும் ஸஷுபி நாயகம் அவர்கள் தப்லீக் பற்றி சொன்ன கருத்துக்களை இன்றுள்ள தப்லீக் ஜமாஅத்தினர்களிடம் நம்மால் கண்கூடாக காண முடிகின்றதல்லவா? என்றும் பஹ்ஜிகளிடம் நாம் கேட்டோம். பதில் இல்லை. 

அல்லாஹ், சூபி ஹழ்ரத் நாயகத்தின் அளப்பெரிய சேவையினூடாக  இந்த நாட்டினைப் பாதுகாத்துவிட்டான். சூபி ஷெய்கு நாயகம் அவர்கள் மட்டும் அன்று தப்லீக் ஜமாஅத்தின் முகத்திரையினை கிழித்திருக்காவிட்டால் இன்று முழு நாடும் வஹ்ஹாபிசத்திற்குப் பலியாகி இருந்திருக்கும். 

1967-68ஆம் ஆண்டளவில் பஹ்ஜதுல் இப்ராஹீமிய்யாவில் கல்வி பயின்றுகொண்டிருந்த மாணவக் குழுவொன்று கிழக்கிலங்கையைச் சேர்ந்த பிரபல மதிப்பக்குரிய பஹ்ஜி ஹழ்ரத் ஒருவரின் தலைமையில் மாத்தறை கொட்டுவக்கொடை ஜும்ஆப் பள்ளிவாயிலில் தங்கியிருந்த தப்லீக் ஜமாஅத்தினை சந்திக்கச் சென்றிருக்கிறது. அதுஇ தப்லீக் ஜமாஅத்தின் ஸ்தாபகர் மௌலவி இல்யாசின் நெருங்கிய நண்பர் ஒருவரின் தலைமையில் வந்திருந்தது. அச்சந்தர்ப்பத்தில் உங்களைப் பற்றி சொல்லுங்கள் என்று அமீர் அவர்களிடம் வினவியிருப்பதும் குறிப்பிடத்தக்கதொரு அம்சமாகும். 

அந்தக் காலத்தில் அவர்கள் வஹ்ஹாபிசக் கருத்துக்கள் எதனையும் பிரசாரம் செய்யவில்லை. தொழுகைக்கு அழைக்கும் செயல் மக்களைக் கவர்ந்திருந்தது. அவர்களின் கொள்கைகள் என்னவென்பதை கேட்டறிந்துகொண்டதன் பின்னரே எமது மதிப்புக்குரிய ஆசிரியர்கள் அவ்வமைப்பினை ஆதரித்தனர் என்றே இவர்களும் நம்மிடம் தெரிவித்தனர். இந்தப் பள்ளி வாசலில் பிரபலமான தர்கா ஒன்று இருந்ததாகவும் பஹ்ஜிகள் தெரிவித்தனர். 

இலங்கையில் உள்ள தப்லீக் ஜமாஅத்தினருக்கும் அன்றிருந்த இந்நாட்டின் பிரபல அறிஞர்களுக்குமிடையில் இடம்பெற்ற நேர்காணலின் பின்னர் இந்தியாவில் இருந்து நம்நாட்டுக்கு வருகை தந்துள்ள தப்லீக் ஜமாஅத்தினர் வழிகேடர்கள் இல்லை. அவர்களும் தரீக்காவாதிகளாகும் என்ற அவர்களின் முடிவானது, பலஸ்தீனம் பறிபோனால் என்ன? சிரியா முஸ்லிம்கள் சீரழிந்தால் என்ன? பர்மா முஸ்லிம்கள் பாழடிக்கப்பட்டால் என்ன? அவர்கள் பற்றி நாம் நம்நாட்டில் பேசவேண்டிய அவசியம் நமக்கில்லை. நாம் நம்நாட்டில் நன்றாக இருந்தால் சரி என்ற நிலைப்பாடுடையவர்கள் போல் தெரிகிறது.   

தப்லீக் ஜமாஅத் இரு வழியில் பயணிக்குமோர் பயணக்குழுவாகும்.  அதாவது சூபிச அஹ்லுஸ் ஸுன்னத் வல்ஜமாஅத்தினை ஆதரித்து வஹ்ஹாபிசத்தினை ஆரம்பத்தில் வண்மையாக கண்டித்துவிட்டு இறுதியில் அஹ்லுஸ் ஸுன்னத் வல்ஜமாஅத்தினை ஷீஆக்கள் என்று கூறி வஹ்ஹாபிச கொள்கைகளை பிரசாரம் செய்தனர். இது சூபிசமும் வஹ்ஹாபிசமும் கலந்த கலவை ஜமாஅத்தாகும்.

தொடரும்....

இலங்கையில் முஸ்லிம்களின் வரலாற்றுத் தொடர்(இலங்கையில் வழிகேடர்களுக்கு முதன் முதலாக வழங்கப்பட்ட ஃபத்வா

இலங்கையில் வழிகேடர்களுக்கு முதன் முதலாக வழங்கப்பட்ட ஃபத்வா.

02-10-1948ல் கல்முனை ஆறாம் குறிச்சி தைக்காப் பள்ளிவாயிலில் வைத்துத்தான் தர்வேஷ் என்பவருக்கு முதன் முதலில் வஹ்ஹாபி என்ற ஃபத்வா வழங்கப்பட்டது.

13-07-1951ல் கல்முனைக் குடி கடற்கரைப் பள்ளிவாயில் முற்றத்தில் வைத்து ஒரு மாநாடு இடம்பெற்றது. அந்த மாநாட்டைப் பற்றி “இரு வழிக்கு ஒரு வழித் தேர்வு” என்ற பெயரில் ஃபத்வா ஒன்று கொடுக்கப்பட்டது. இந்த மாநாட்டிற்கு நீதிபதியாக கடமையாற்றியவர் 1922ல் ஆரம்பிக்கப்பட்ட கிழ்ரிய்யா அரபிக் கல்லூரியின் அதிபரான மௌலானா மௌலவி ஏ.எச்.ஏ.எம். அலியார் மரைக்கார் ஆலிம் என்பவராகும்.

இலங்கை பரகஹதெனிய ஜும்ஆப் பள்ளி வாயில் இருந்த தர்கா உடைக்கப்பட்ட வரலாறு.

காலப்போக்கில் தௌஹீத் ஜமாஅத், தப்லீக் ஜமாஅத்தினர்களின் வருகையினை அடுத்து இந்த கிராமத்தில் இடம் பெற்ற மேற்கூறிய அம்சங்கள் மெல்லமெல்ல மறையத் தொடங்கியன. 18-10-2011ல் பெரிய பள்ளி வாசலில் இருந்த இரு தர்காக்களும் அகற்றப்பட்டு விட்டன. பரகஹதெனிய கிராமத்தில் முஸ்லிம்களின் எழுற்ச்சிக்கும் பள்ளி வாசலோடு ஜமாஅத்தாரின் தொடர்பைப் பேணுவதிலும் காதிரிய்யா தரீக்காவின் தோற்றம் ஒரு காரணமாய் அமைந்திருந்தது என்பதை எவராலும் மறுக்க இயலாது, (1987 ஆம் ஆண்டு வெளியிடப்பட்ட பறகஹதெனிய பெரிய பள்ளிவாசல் நூற்றாண்டு மலருக்கென அப்போதைய நிர்வாக சபையின் செயலாளராகக் கடமையாற்றிய மர்ஹும்களான சீ.எஸ்.எம். ஸவாஹிர், மற்றும் இணைச் செயலாளர் ஏ.எம்.நிசார் அவர்கள் எழுதிய வரலாற்றுக் கட்டுரையில் இருந்து இது தரப்படுகிறது.

இலங்கையில் ஜமாஅத்தே இஸ்லாமி.

ஜமாஅத்தே இஸ்லாமிய இயக்கத்தின் ஸ்தாபகர் அபுல் அஃலா மௌதூதி ஸாஹிப் 25-09-1903 ஆம் வருடம் அன்றைய இந்தியாவின் அவ்ரங்காபாத் என்ற ஊரில் பிறந்தவர் அமெரிக்காவிலுள்ள தம் மகளைப் பார்ப்பதற்காக அங்கே சென்றபோது 22-09-1979ல் அவர் மலசலக் கூடத்தில் மரணமானார். 1941ல் அன்றைய இந்தியாவில் ஜமாஅத்தே இஸ்லாமி - இஸ்லாமிய கூட்டம் என்ற அமைப்பினை தோற்றுவித்தார்.

இலங்கையில் 1945க்குப்பின் தடம்பதித்து காலூன்றி காட்டுத் தீ பரவுவதுபோலும், உடலில் விஷம் சென்றேறுவதுபோலும் மௌதூதி ஸாஹிப் உண்டாக்கிய ஜமாஅத் இஸ்லாமி பரவிக் கொண்டிருந்த சந்தர்ப்பத்தில் அதன் அடிநாதம் அறிந்து அதன் வலையில் சிக்கவிடாது “மௌதூதி ஸாஹிபும் ஜமாஅத்தே இஸ்லாமியும்” என்றதொரு நூலைத் தொகுத்து 1976ஆம் ஆண்டளவில் வெளியிட்ட அல்ஆலிமுல் ஃபாழில் அஷ்ஷெய்கு அப்துல் காதிர் ஷெய்கு ஸஷுபி ஹழ்ரத் நாயகம் அவர்களையும் இந்த நூல் வெளியாகி சுமார் பத்து வருடங்களின் பின்னர் அதாவது 1987, 88 களில்  “இறக்குமதியும் குழப்பமும்” என்ற நூலைத் தொகுத்தளித்த மௌலானா மௌலவி அல்ஹாஜ் அல்உஸ்தாத் எம்.ஐ. அப்துஸ் ஸமத் மக்தூமி ஹழ்ரத் அவர்களையும் நன்றியுடன் நினைவுகூர்கின்றொம்.

கி.பி.1915க்குப் பின் இலங்கையில் புதிதாக இயக்கங்கள் இறக்குமதியாக ஆரம்பித்தன. இதனால் 1936க்குப் பின் இலங்கையின் பல பகுதிகளில் முஸ்லிம்களுக்கு மத்தியில் குழப்பங்களும் அடிதடிகளும் ஆரம்பித்தன. 1938ல் இருந்து இங்கு இறக்குமதியாகும் கொள்கைளிலுள்ள தவறுகள் வழிகேடுகளைக் குறித்து பெரும் பெரும் ஸாலிஹான உலமாக்கள் எச்சரிக்கை செய்து வந்துள்ளனர்.

தமிழ்பேசும் முஸ்லிம்கள் இந்த இறக்குமதிகளிலுள்ள தவறுகளை, வழிகேடுகளை அறிந்து அவற்றை ஏற்றுக்கொள்ளாமல் தள்ளிவிட்டு நேர் வழி பெறுவதற்காக குழப்பவாதிகள் ஜாக்கிறதை, ஜமாஅத்தே இஸ்லாமியும் அஹ்லே சுன்னாஹ்வும், முஸ்லிம் குரல் ஆகியவற்றுடன் சில துண்டுப் பிரசுரங்கள், ஃபத்வாக்கள் தமிழில் பகிரங்கமாகவே வெளி வந்துள்ளன.

இஸ்லாமிய ஷரீஅத்தின்படி நடந்துகொண்டிருக்கின்ற தரீக்காக்களை மட்டம் தட்டியிருக்கிறார்கள். நான்கு இமாம்களில் எவரையும் பின்பற்றத் தேவையில்லை என்றிருக்கின்றார்கள். அல்குர்ஆன் அல்ஹதீதை நேரடியாகப் பின்பற்றவேண்டும் என்று பிரசாரம் செய்துள்ளார்கள். இவைதான் அந்த இயக்கங்கள் செய்த மாபெரும் தவறாகும். 

இதற்காகத்தான் அவர்கள் வழிகேடர்கள். அவர்களுடன் சேரவேண்டாம் என்று ஸாலிஹான உலமாக்களால் 1938ல் இருந்து பிரசாரம் மேற்கொள்ளப்பட்டிருக்கிறதென்று அல்உஸ்தாத் மர்ஹும் அப்துஸ் ஸமத் ஹழ்ரத் அவர்கள் இறக்குமதியும் குழப்பமும் என்ற நூலில் பதிவு செய்திருக்கின்றார்.

ஜமாஅத்தே இஸ்லாமி அமைப்பின் கொள்கைகள்.

“றசூல்மார்கள் தங்களின் கடமையில் தப்புத் தவறுகள் செய்துள்ளனர். நபிமார்கள் பாவம் செய்துள்ளனர். ஸஹாபா, தாபிஈன்கள், நான்கு மத்ஹப் இமாம்களைப் பின்பற்றத்தேவையில்லை. ஒற்றைக் கண்ணன் தஜ்ஜால் வெளி வருவதைப் பற்றி வந்த ஹதீத்கள் பொய்யாகும். சுபுஹ் தொழுகையில் குனூத் இல்லை. கூட்டு துஆ கூடாது. தராவீஹ் எட்டு ரக்அத்துக்கள். கூட்டு திக்ர், ஸலவாத் கூடாது. அதானுக்கு முன்னால் ஸலவாத் சொல்லக்கூடாது.” இவை ஜமாஅத்தே இஸ்லாமியின் கொள்கைகளாகும். பார்க்க: இறக்குமதியும் குழப்பமும்.

ஷபாஅத்துல் குப்ராவை நிராகரிப்பது வழிகேடாகும். சங்கையான புர்தா ஷரீபில் குர்ஆனுக்கும்,  ஹதீஸுக்கும் விரோதமானவைகள் இருப்பதாகவும் அதில் “யா அக்ரமல் கல்கி மாலீ மன் அலூது பிஹி – சிவாக இந்த ஹுலூலில் ஹாதிதில் அமிமி” என்ற கவியில் பெரிய ஷிர்கு இருப்பதாகவும் இதைச் சொன்ன பூஸரி என்பவர் நரகத்தில் அவர் (எக்காலமும்) தங்கி இருப்பார் என்றும் ஒரு முஸ்லிம் விசுவாசம் கொண்டால் அல்லது சொன்னால் சந்தேகமின்றி அவன் மதம் மாறிய சுத்தமான முர்தத்தாக இருப்பான் என்று அழுத்தம் திருத்தமாகச் சொல்கிறேன் என் மர்ஹூம் அல்-ஆலிம் எம்.வை.அப்துஸ் ஸமத் மக்தூமி ஹழ்ரத் அவர்கள் இலங்கை முஸ்லிமின் மத்ஹப் எனும் நூலின் 19ஆம் பக்கத்தில் குறிப்பிடுகிறார்.

அன்ஸார் ஷுன்னத் முஹம்மதிய்யா வழிகெட்ட அமைப்பென்று சொல்லபட்டு. பத்வாக்கொடுப்பட்டது. திருந்தினார்களா? இல்லை. குறைந்தார்களா? அழிந்தார்களா? இல்லை. மாறாக வளர்ந்தார்கள். அத்துடன் அஹ்லுஸ் ஷுன்னத் வல்ஜமாஅத்தினர் தம்மீது பழி சுமத்துவதாக குற்றம் சாட்டினார்கள். அஹ்லுஸ் ஷுன்னத் வல்ஜமாஅத்தினர்தான் வழிகேடர்கள். பித்அத்வாதிகள் என்று தர்வேஷின் அமைப்பு பிரச்சாரம் செய்கின்றது. அவ்வாறே ஜமாஅத்தே இஸ்லாமி வழிகெட்ட இயக்கமென்று சொல்லப்பட்டது. அவர்களது மார்க்கவிரோதக் கருத்துக்கள் சுட்டிக் காண்பிக்கப்பட்டது. அவர்களுக்கு எதிராக நூற்கள் எழுதப்பட்டன. அவர்கள் திருந்தினார்களா? குறைந்தார்களா? அழிந்தார்களா? இல்லை. மாறாக தர்வேஷின் அமைப்பு எவ்வாறு நடந்துகொண்டதோ அவ்வாறே அஹ்லுஸ் ஸுன்னத் வல்ஜமாஅத்தினர் அவர்களின் கருத்துக்களை தவறாக விளங்கிக்கொண்டதாகவே சொன்னார்கள். அஹ்லுஸ் ஸுன்னத் வல்ஜமாஅத்தினர்தான் வழிகேடர்கள், பித்அத்வாதிகள் என்றார்கள்.

தொடரும்.....

இலங்கையில் முதன் முதலில் ஸ்தாபிக்கப்பட்ட வழிகெட்ட அமைப்பு.

இலங்கையில் முதன் முதலில் ஸ்தாபிக்கப்பட்ட வழிகெட்ட அமைப்பு.

புத்தளம் நகரத்தில் இருந்து சுமார் 100 கி.மீ தூரத்தில் பரகஹதெனிய என்றதொரு அழகிய ஊர் இருக்கிறது. பரகஹதெனிய குருணாகல் மாவட்டத்தில் முஸ்லிம்கள் அதிகமாக வாழும் ஒரு கிராமம். இந்த கிராமத்தின் தற்போதய பெரிய ஜும்ஆப் பள்ளி 1820ஆம் வருடம் தென்னிந்தியா கோட்டாரைச் சேர்ந்த காதிரிய்யா தரீக்கா வழிமுறையில் வந்த அஷ்ஷெய்கு சுலைமான் காதிரி என்பவருக்கு அன்பளிப்புச் செய்யப்பட்ட காணியில் அவரின் முயற்சியினால் கட்டப்பட்ட பள்ளியாகும். 

இந்தப் பள்ளி வாசலில் தரீக்காக்களின் ஷெய்குமார்களின் கந்தூரி இடம் பெற்றிருக்கிறது. குறிப்பாக ஷஃபான் மாதம் தலைப்பிறையில் ராத்திப் முழக்கத்துடன் கொடியேற்றப்பட்டு எட்டாம் நாள் பெரிய கந்தூரி வருடாந்தம் கொடுக்கப்பட்டு வந்திருக்கிறது. இது இலங்கை நாட்டில் பிரபலமானதொரு கந்தூரியாக இருந்திருக்கிறது. ஒவ்வொரு வெள்ளிக் கிழமை இரவும் கௌதிய்யா, ஹத்தாதிய்யா, ஜலாலிய்யா ராதிபுகளும் இங்கு இடம் பெற்றிருக்கின்றன.

புத்தளம் நகரத்திற்கு அருகாமையில் உள்ள குருணாகல் மாவட்டத்திலுள்ள பரகஹதெனிய என்னும் கிராமத்தில் தர்வேஷ் என்பவரால் 1948ஆம் வருடம் துவக்கம் பெற்ற ஒரு அமைப்புத்தான் அன்ஸார் சுன்னத் முஹம்மதிய்யா என்னும் இயக்கமாகும். சவுதி அரேபியாவில் படிக்கச் சென்று வந்த பின்னரே இவர் இதனை ஆரம்பித்திருக்கிறார். 

இலங்கை அன்ஸார் சுன்னத்து முஹம்மதிய்யாவின் கொள்கை.

“அல்லாஹ் அர்ஷில் இருக்கின்றான். ஸல்லல்லாஹு அலைஹி வஆலிஹி வசல்லம் அவர்களுக்கு ஷஃபாஅத் கிடையாது. மௌலித் ஓதுவது கூடாது. தராவீஹ் எட்டு ரக்அத்துக்களே. இமாம் பூசீரி போன்றவர்கள் காபிர்கள் (நஊதுபில்லாஹ்). கப்ருகள் தரிசிப்பது ஹராம். கிழ்ர் அலைஹிஸ்ஸலாம் அவர்கள் இறந்துவிட்டார்கள். தரீக்காக்கள் அனைத்தும் வழிகேடு. நபிமார்,வலிமார்களுக்கு நேர்ச்சை செய்வது தெய்வ வணக்கமாகும். கப்ரைக் கட்டுவது ஹராமாகும். கப்ருகளில் குறிப்பிட்ட நாட்களில் ஒன்று சேர்ந்து கந்தூரி கொடுப்பது வழிகேடு. கொடியேற்றுவது ஷிர்க்காகும். ஜனாஸா கொண்டு செல்லும்போது திக்ர்இ ஸலவாத் சொல்வது வழிகேடு. தல்கீன்இ கத்தம் பாத்திஹா ஓதுவது வழிகேடு. ஜும்ஆவில் மஹ்ஷர் ஓதுவது வழிகேடு. கூட்டுப் பிரார்த்தனை வழிகேடு. குனூத் ஓதுவது வழிகேடு. நேர்ச்சை செய்யப்பட்ட பிராணிகளை உண்பது ஹராம்.” ஆகிய அம்சங்களை தர்வேஷ் பிரச்சாரம் செய்தார்.  

தொடரும்...

இலங்கையில் நவீன கொள்கையின் துவக்க வரலாறு.

இலங்கையில் நவீன கொள்கையின் துவக்க வரலாறு.

இலங்கை முஸ்லிம்களின் பூர்வீக குடியிருப்பானது மாற்று மத சகோதரர்களால் நிராகரிக் கப்படுவதை விட இஸ்லாமிய மத வெறியர்களால்தான் கூடுதலாக நிராகரிக்கப்படுவதைப் பார்க்கின்றொம். 

இதே மத வெறியாளர்கள்தான் இஸ்லாமியர்களின் பூர்வீக கொள்கையினையும் குழி தோண்டிப் புதைத்துக்கொண்டிருக்கின்றார்கள். 

புத்தளம் பிரதேசமானது இலங்கை முஸ்லிம்களின் பூர்வீக குடியிருப்புக்கு துவக்க பூமியாக இருப்பதுபோன்று பூர்வீக கொள்கையினை தெளிவுபடுத்துவதற்குத் தேவையான அநேக அம்சங்களை இப்பிரதேசம் தன்னகத்தில் கொண்டிருக்கிறது. தற்போது நவீன கொள்கைக்கான துவக்க பூமியாகவும்  இப்பிரதேசம் இருப்பது ஆச்சரியமாகவும் அதிசயமாகவும் இருக்கிறது.

புத்தள பள்ளி வாசல் பரிபாலனம் அண்மைக்காலம் வரை செல்வாக்குப் பெற்றிருந்த மரைக்கார் குடும்பத்தினரின் கைகளிலேயே இருந்து வந்தது. 1877ஆம் ஆண்டிலிருந்து முதலாளி குடும்பம் என்ற குடும்பத்தினரும் பள்ளிவாசல் பரிபாலனத்தில் பங்கேற்கத் தொடங்கினர். இதனையடுத்து கந்தூரி கொடுத்தல், சந்தணக்கூடு ஏற்றுதல், தர்காக்களை பராமரித்தல் போன்ற விடயங்களில் இவ்விரு குடும்பத்தினர்களுக்கும் மத்தியில் தகராறு ஏற்படத் தொடங்கியது. 

1913 முதல் 1935 வரை இரு தரப்பாருக்கும் புத்தளம் நீதி மன்றத்திலும் இலங்கை உயர் நீதி மன்றத்திலும் வழக்குகள் இடம் பெற்றன. இறுதியில் வழக்கமாக நடத்தப்பட்டு வந்த நிகழ்வுகள் தொடர்ந்தும் நடத்த நீதிமன்றம் அனுமதி வழங்கியது. இது மரைக்கார் குடும்பத்துக்கு சார்பான தீர்ப்பாக அமைந்தது. எனினும் பிரச்சினைக்கு இது ஒரு தீர்வினைக் கொண்டு வரவில்லை.

தர்கா உடைக்கப்பட்டு அங்கு புதிய பள்ளிவாசல் கட்டப்படவேண்டும் என்று கூட்டு எதிர்ப்பாளர்கள் வலியுறுத்தி வந்தனர். ஊரில் ஏற்பட்டு வந்த குழப்பங்களுக்கு தீர்வு காணும் முகமாக 1927ஆம் ஆண்டு புகழ் பெற்ற முஸ்லிம் தலைவர்களான நீதிபதி ஏ.ரி. அக்பர், டி.பி. ஜாயா, என்.எச்.எம். அப்துல் காதர், சேர். மாக்கான் மாக்கார் ஆகியோரைக் கொண்ட விசாரணைக் குழுவை தேசாதிபதி நியமித்தார். 

புத்தளத்தில் விசாரணை மேற்கொண்ட இக்குழுவினர் தர்காவை உடைக்கவேண்டாம் என்றும் வேறொரு இடத்தில் புதிய பள்ளி வாசல் கட்டப்பட வேண்டும் என்றும் தமது ஆலோசனையை வெளியிட்டனர். தர்கா இடிக்கப்பட வேண்டும் என்ற பிரிவைச் சேர்ந்தவர்கள் இம்முடிவை ஏற்றுக்கொள்ளவில்லை. மீண்டும் குழப்ப நிலை தோன்றியது. தர்காவை இடிக்கவேண்டும் என்ற கோரிக்கை படிப்படியாக வெற்றி பெற்றது. 

ஏறத்தாள 500 வருடங்கள் பழைமையான பல வெளிநாட்டு யாத்திரிகர்களின் கவனத்தையும் கண்டி மன்னர்களின் கௌரவத்தையும் ஈர்த்ததோடு புத்தளம் மக்களின் ஆரம்ப குடியேற்ற வரலாற்றிற்கு ஒரு முக்கியத்துவத்தையும் வழங்கி வந்த முஹ்யித்தீன் தர்கா 1933-34ல் இடிக்கப்பட்டது. இது புத்தளம் வரலாற்றில் மட்டுமன்றி இலங்கை முஸ்லிம்களின் வரலாற்றில் அக்கறையுள்ளவர்களையும் அதிர்ச்சியில் ஆழ்த்திய சம்பவமாகும். பார்க்க: புத்தளம் முஸ்லிம்கள் வரலாறும் வாழ்வியலும்- கலாநிதி எம்.எஸ்.எம்.அனஸ். 

தொடரும்.........

இலங்கை முஸ்லீம்களின் பூர்வீக குடியிருப்பு வரலாறு(இலங்கையின் பாரம்பரிய கொள்கை.)

இலங்கையின் பாரம்பரிய கொள்கை.

களுத்துறை, மாத்தளை, மாத்தறை, கண்டி, அநுராதபுரம், அம்பாறை, புத்தளம் ஆகிய மாவட்டங்களுடன் ஏறாவூர் காத்தான்குடி நகர முஸ்லிம்களின் வரலாறு, பாரம்பரியம் என்பன ஆராயப்பட்டு தொகுத்து நூலாக்கப்பட்டிருக்கின்றன.

இலங்கை முஸ்லிம்களின் வரலாறு தொடர்பில் எழுதப்பட்டுள்ள சகல மொழி நூற்களும் இலங்கை முஸ்லிம்கள் அரேபியர் வம்சத்தினர் என்றே குறிப்பிடுவதுடன் அந்த அரேபியர் கிரேக்கர்களும் ரோமர்களும் இலங்கையை அறிந்திருந்த காலத்திற்கு முன்பிருந்து அறிந்து இங்கு வாழ்ந்து வந்ததாகவும் குறிப்பிடுகின்றது. ஆதி பிதா ஆதம் அலைஹிஸ்ஸலாம் அவர்களின் பாதச் சுவடு இங்குள்ள மலைச்சிகரமொன்றில் காணப்படுகின்றது என்ற நம்பிக்கையும் அரேபியர்களின் கவன ஈர்ப்புக்குக் காரணமாகும்

அருமை நாயகம் முஜ்தபா ஸல்லல்லாஹு அலைஹி வஆலிஹி வசல்லம் அவர்களையடுத்து மக்கா, மதீனா, யெமன், பாரசீகம், இந்தியா முதலிய நாடுகளில் இருந்து  இஸ்லாமிய தஃவா பணியின் பொருட்டு அவ்லியாக்கள் இப்பிரதேசங்களுக்கு வருகை தந்து சமயப் பணியாற்றி மக்களை இஸ்லாத்தின் பக்கம் ஈர்த்தெடுத்தனர். சிலர் இங்கேயே வாழ்ந்து சமாதிகொண்டுள்ளனர். அவர்கள் அடக்கப்பட்ட ஸ்தலங்கள் முஸ்லிம்களின் புனிதஸ்தலங்களாகப் பேணப்பட்டு வருகின்றன.

இந்த ஸியாரங்களைச் சூழவே முஸ்லிம்களின் ஆதிக் குடியேற்றங்கள் பெரும்பாலும் தோன்றியிருக்கிறன. இவ்வாறு இப்பிராந்திய முஸ்லிம்களின் குடிப்பரம்பலானது ஸியாரத்திற்காகவும் தஃவா பணிக்காகவும் இங்கு விஜயம் செய்த அரேபிய மற்றும் கிழக்காசிய முஸ்லிம் ஆண்களின் நேரடியான வருகையில் இருந்தே தோற்றம் பெற்றுள்ளது. பார்க்க: அம்பாறை மாவட்ட முஸ்லிம்கள் வரலாறு பக்கம் 68,69

சுப்ஹான மௌலித், கிழ்ர் மௌலித், காஜா முஈனுத்தீன் மௌலித், ஹரீரி மௌலித், ஷெய்கு தாவூத் மௌலித், பத்ர் ஸஹாபாக்கள் மௌலித், ஹத்தாத் ராதிப், ஜலாலிய்யா ராத்திப் என்பன இடம் பெற்று கந்தூரி கொடுக்கும் பழக்கம் அநுராதபுரத்தில் காணப்பட்டிருக்கிறதென்றும் முஹ்யித்தின் பள்ளி வாசல் என்று பெயரிடப்பட்ட பள்ளிகளே இம்மாவட்டத்தில் நிறைய உள்ளதாகவும் நாகூர் ஆண்டகையின் நினைவாக சில பள்ளிவாயில்கள் இருப்பதாகவும் அநுராதபுர மாவட்ட வரலாறு சொல்கிறது. பக்கம்: 40,41.

இன்றைக்கு 452 வருடங்களுக்கு முன் அதாவது 1494ஆம் வருடம் ஓர் வன்னியனாரின் மகள் மீரா உம்மா என்பவள் முஹ்யித்தீன் ஆண்டவர் தர்காவிற்காக புத்தளம் பட்டின மத்தியில் ஓர் இடத்தை அன்பளிப்புச் செய்தாஹக. இக்காணியில் கடற்கரையோரமாய் முஹ்யித்தீன் தர்கா ஊரவர்களின் முயற்சினால் கட்டப்பட்டது.

குத்பு நாயகம் முஹ்யித்தின் அப்துல் காதிர் ஜீலானி அவர்களை நினைவுபடுத்தும் பல நிகழ்ச்சிகளும் கொண்டாட்டங்களும் வருடந்தோறும் புத்தளம் மாவட்டத்தில் பல இடங்களில் இடம் பெற்றிருக்கின்றன என்று புத்தள மாவட்ட வரலாறு சொல்கிறது. குத்பு நாயகம் அவர்கள் கி.பி.1166ல் பக்தாதில் சமாதியுற்ற ஒரு பெரியாராகும். இதுவே இந்நாட்டு இஸ்லாமியர்களின் பூர்வீக கொள்கை ரீதியான வரலாறாகும். இந்த வரலாறும் சில தீய சக்திகளால் மறுக்கப்படுகிறது. மறைக்கப்படுகிறது. பொய்யானது, பிழையான தென்று பிரசாரம் செய்யப்பட்டும் வருகின்றது.

தொடரும்......

இலங்கை முஸ்லீம்களின் பூர்வீக குடியிருப்பு வரலாறு(வாப்புச்சி மரைக்கார்)

வாப்புச்சி மரைக்கார்.

கி.பி.1016ல் அரப் நாட்டில் இருந்து (இற்றைக்கு சுமார் 1000 வருடங்களுக்கு முன்பு) இலங்கைக்கு வருகை தந்த பெருமக்களில் அஷ்ஷெய்கு ஃபரீத் என்பவர் சிறந்த மருத்துவராகும். இவரின் பரம்பரையில் உள்ளவர்களே வாப்புச்சி மரைக்கார், சேர் ராஸிக் பரீத் போன்றவர்கள். சேர் ராஸிக் பரீத் அரூஸிய்யத்துல் காதிரிய்யா தரீக்காவின் தலைவராக இருந்துள்ளார். கொழும்பு அரும்பொருள் காட்சி சாலை, தலைமைத் தபால் நிலையம், நகர மண்டபம் போன்றவைகளை வாப்பிச்சி மரைக்கார் கட்டிக்கொடுத்திருக்கிறார். (இஸ்லாமியக் கலைக் களஞ்சியம் 4-473)

இலங்கையின் முதல் அரபுக் கல்லூரி.

இலங்கையில் முதல் அரபுக் கல்லூரி 1870ஆம் வருடம் காலி மாநகரில் மக்கிய்யா என்ற பெயரில் ஆரம்பித்து வைக்கப்பட்டுள்ளது. இதன் ஸ்தாபகர்களாக அஹ்மத் ஸாலிஹ் அல் யமானியும் அபூ பக்கர் மிஸ்கீன் அல் காஹிரி ஆகிய இருவரும் விளங்குகிறார்கள்.


தொடர்ந்து 1884ல் வெலிகம மத்ரஸதுல் பாரி அரபுக்கல்லூரி நிறுவப்பட்டுள்ளது.

இதன் ஸ்தாபகர் மாப்பிள்ளை லெப்பை ஆலிம் அவர்களாகும்.

இக்காலப்பகுதிகளில் தரீக்காக்கள் அல்லாத வேறு எந்த தஃவா அமைப்புக்களும் இலங்கையில் செயற்படவில்லையென்பதை இலங்கை முஸ்லிம் சமய பண்பாட்டலுவல்கள் திணைக்களம் உறுதிப்படுத்துகிறது.

இதன் அடிப்படையில் கி.பி1844 புத்தளத்தில் காஸிமிய்யா அரபிக் கல்லூரி ஐதுரூஸிய்யா தரீக்கத்தின் அடிப்படையில் ஆரம்பிக்கட்டுள்ளது. 1892ல் காலியில் பஹ்ஜதுல் இப்ராஹீமிய்யா ஷாதுலிய்யா தரீக்கத்தின் அடிப்படையில் ஆரம்பிக்கப்பட்டிருக்கிறது. இதே வருடம் கிண்ணியாவில் சஃதிய்யா அரபிக் கல்லூரி ஆரம்பிக்கட்டிருக்கிறது.

கி.பி1912ல் மாத்தறையில் மின்ஹத்துல் ஃபாஸிய்யா அரபிக் கல்லூரியும் 1918 தர்கா நகரில் முஅய்யிதுல் இஸ்லாம் என்ற பெயரிலும் 1922ல் வெலிகம மாத்தறையில் கிழ்ரிய்யா அரபிக் கல்லூரி 1935ல் மஹறகமையில் கபூரிய்யா அரபிக் கல்லூரியும் ஆரம்பிக்கப்பட்டிருக்கிறது. இது அலவிய்யதுல் காதிரிய்யா தரீக்கத்தின் முக்கியஸ்தர் அல்ஹாஜ் என்.டி.எச். அப்துல் கபூர் என்பவரால் ஆரம்பிக்கப்பட்டிருக்கிறது. இவர் கொழும்பு மருதானை ஜும்ஆ பெரிய பள்ளிவாயிலின் பரிபாலன சபைத் தலைவராகவும் கடமையாற்றிருக்கின்றார். இப்பள்ளிவாயலின் முற்றத்தில் காணப்படுகின்ற மண்ணறை இவரது மண்ணறையாகும்.

இலங்கைத் திருநாட்டில் பதிவு செய்யப்பட்ட அரபு மத்ரசாக்களில் மேற்குறிப்பிட்ட அரபு மத்ரசாக்களைத் தவிரவுள்ள அனைத்து அரபு மத்ரசாக்களும் 1940க்குப் பிறகுதான் ஆரம்பிக்கப்பட்டிருக்கின்றன.

தொடரும்....

இலங்கை முஸ்லீம்களின் பூர்வீக குடியிருப்பு வரலாறும் ஆதம் (அலைஹிஸ்ஸலாம்)மலையும்.

ஆதம் (அலைஹிஸ்ஸலாம்)மலை.

கி.பி.1187 முதல் 1196 வரை ஆண்ட இலங்கை மன்னன் (திஸ்ஸங்க மல்ல) என்ற அரசர் ஆதம் மலையினைத் தரிசித்துள்ளார். அங்குள்ள பாதச் சுவட்டை அவ்வரசர் கைகூப்பி வணங்கிக்கொண்டிருப்பதுபோன்றும் அங்குள்ள கல்லொன்றில் செதுக்கப்பட்டிருக்கின்றது. அதன் அருகே அரபியில் முஹம்மத் (ஸல்லல்லாஹு அலைஹி வஆலிஹி வசல்லம்) அவர்களை அல்லாஹ் ஆசிர்வதிப்பானாக!.... மனித இனத்தின் தந்தை என்று பொறிக்கபட்டுள்ளது. பார்க்க: இஸ்லாமியக் கலைக் களஞ்சியம் 02-313.

ஆதம் (அலைஹிஸ்ஸலாம்)மலையைத் தரிசித்த பெருமக்கள்.

நபிமார், வலிமார்களுடன் தொடர்புள்ள சகல வஸ்துக்களும் பாதுகாக்கப்படவேண்டும். பராமரிக்கப்படவேண்டும். தரிசிக்கப்படவேண்டும். இது இஸ்லாம் கற்றுத் தரும் பாடமாகும். அந்த வகையில் நபியுல்லாஹ் ஆதம் அலைஹிஸ்ஸலாம் அவர்கள் பாதம் இலங்கையில் இருக்கிறதென்பதே ஊர்ஜிதம் செய்யப்பட்ட வரலாற்றுத் தகவலாகும். இதனை பன்னாட்டு முஸ்லிம்களும் தரிசித்துள்ளனர்.

கிரேக்கர்களும் ரோமர்களும் இலங்கையினை அரேபியர்களிடம் இருந்து அடையாளம் கண்டு கொண்டதாக வரலாறு கூறிக் கொண்டிருக்கிறது. அந்தக் காலத்து அரபிகள் இலங்கையில் தங்கிச் சென்றுள்ளார்கள். ஆதம் மலை இலங்கையில் இருந்ததே அவர்கள் இப்பிரதேசம் நாடி வந்ததற்கான காரணங்களில் ஒன்றாகச் சொல்லப்படுகிறது.

கி.பி.1153க்குப் பிற்பட்ட காலப்பகுதியில் கௌதுல் அஃழம் குத்புல் அக்தாப் ஷெய்குல் மஷாயிக் அஷ்ஷெய்கு முஹ்யித்தீன் அப்துல் காதிர் ஜீலானி கத்தசல்லாஹு சிர்ரஹுல் அஸீஸ் அவர்கள் மார்க்கப் பணியாற்ற இலங்கைக்கும் வந்திருக்கிறார்கள். அந்தக் கால கட்டத்தில் பாவா ஆதம் மலைக்கு பலாங்கொடை வழியாக பயணித்திருக்கின்றார்கள். தப்தர் ஜெய்லானி என்று சொல்லப்படுகின்ற இடத்தில் சுமார் 12 ஆண்டுகள் தியானத்தில் இருந்திருக்கிறார்கள். இது தொடர்பான பல தகவல்கள் தப்தர் ஜெய்லானி என்ற வரலாற்று நூலில் பார்வையிடலாம்.

இலங்கைக்கு வந்த மற்றொர் இறைநேசச் செல்வர் அப்துல்லாஹ் இப்னு கஃபீஃப் என்பவராகும். அவரைப் பற்றி இப்னு பதூதா தம்முடைய பிரயாண நூலில் குறிப்பிடு கின்றார். 

நாகூரில் அடங்கப்பட்டிருக்கும் ஷாஹுல் ஹமீத் வலிய்யுல்லாஹ் அவர்களும் ஆதம் மலையைத் தரிசிப்பதற்காக இலங்கைக்கு வந்து சென்றுள்ளார். இவர்களுடன் வந்த செய்யிதுனா ஷிஹாபுத்தின் வலிய்யூல்லாஹ் இலங்கையிலேயே தங்கி கண்டியில் அடங்கப்பெற்றார்கள். கி.பி.1855ல் இவர்களுக்கு தர்கா கட்டப்பட்டுள்ளது.

அரபாத்திலிருந்து ஆதம் மலையை தரிசிப்பதற்காக வந்த செய்யிதுனா அஷ்ஷெய்கு உஸ்மான் ஸித்தீக் இப்னு அப்திர் ரஹ்மான் வலிய்யுல்லாஹ் என்பவராகும்.

மாத்தறையில் அடங்கப்பட்டுள்ள யஹ்யா ஹாஜியார் அப்பா, அழுத்காமத்தில் அடங்கப்பட்டுள்ள ஷெய்கு ஹஸன் பின் உஸ்மான் மக்தூமி நாயகம் அவர்கள், கம்பளையில் அடங்கப்பட்டுள்ள பாபா கௌஃபி (கூஃபி பாவா) அவர்கள் மக்காவில் இருந்து வந்திருக்கின்றார்கள். வியாங்கொடைப் பகுதியில் உள்ள கஹட்டவிட்டவில் அடங்கப்பட்டிருக்கும்

ஷெய்கு இப்னு உமர் பாதிப் நாயகம் அவர்கள் யமனில் இருந்து கி.பி.1840ல் வந்துள்ளனர். இவ்வாறு இன்னும் பலர் பாவா ஆதம் மலையைத் தரிசிப்பதற்காக அரப் நாடுகளில் இருந்து இலங்கை வந்திருக்கின்றார்கள். மார்க்கப் பணியாற்றியுள்ளனர். பார்க்க: இஸ்லாமியக் கலைக் களஞ்சியம் 2-313. 

தொடரும்.....

இலங்கையின் முதல் இறை இல்லம்.

இலங்கையின் முதல் இறை இல்லம். 

காலி தலாப்பிடியா சோலை முஹ்யித்தீன் ஜும்ஆப் பள்ளி வாயில்

இலங்கையின் முதல் இறை இல்லம் பேருவளை தர்கா நகர் சீனா துறை ஜும்ஆப் பள்ளி வாசல் என்றதொரு தகவலினை சோலை மலர் சொல்லியிருப்பதைக் காண முடிகிறது. ஆனாலும் அருமை நாயகம் முஜ்தபா ஸல்லல்லாஹு அலைஹி வஆலிஹி வசல்லம் அவர்கள் காலத்தில் அவர்களாகவே தமது தோழர்களில் இருவரை இலங்கைக்கு அனுப்பி வைத்திருந்தார்கள் என்ற வரலாற்றுத் தகவலின்படி அருமைத் தோழர்கள் தங்களது வணக்க வழிபாடுகளை நிறைவேற்றிக் கொள்வதற்காக நிச்சயம் வணக்கஸ்தலங்களை அமைத்திருக்கவேண்டும். ஸஹாபாக்கள் இலங்கைக்கு வந்தடைந்த பின்னர் அப்பகுதி அரசன் அவர்களுக்கு பூரண ஒத்துழைப்பு வழங்கியிருக்கிறார். தமது மார்க்கப் பணியினை மேற்கொள்வதற்கு முழுமையான ஆதரவும் வழங்கியிருக்கின்றார். 

காலி தலாப்பிடியா சோலை முஹ்யித்தீன் ஜும்ஆப் பள்ளி வாயில் கி.பி.1604ல் புனர் நிர்மாணம் செய்யப்பட்டபோது ஹிஜ்ரி 8-9-139 என்று எழுதப்பட்ட மீசான் கல் ஒன்று கண்டு பிடிக்கப்பட்டது. இதனடிப்படையில் இப்பள்ளிவாயில் இன்றைக்கு 1299 வருடங்கள் பழமையானது. 

இப்பள்ளிவாயில் 27-06-1986 ஆம் வருடம் மீண்டும் புனரமைப்புப் பணிகள் ஆரம்பமாயின. 03-03-1987ஆம் திகதி இப்புனரமைப்பு பணியில் ஊழியர்கள் ஈடுபட்டுக் கொண்டிருக்கும்போது அதிசயச் சம்பவம் ஒன்று நடைபெற்றது. அதனை நேரில் கண்டவர் அப்பிரதேசத்தில் அமைந்துள்ள இஸ்லாமிய இளைஞர் முன்னணி, ஜனாப் எம்.எச்.எம். வஹாப் (சமாதான நீதிபதி) முன்னிலையில் விசாரித்து பதிவு செய்து கொண்டது. அந்த நிகழ்வு வருமாறு.

பள்ளியின் மிகப் பழைய இடங்களில் ஒன்றான மிம்பரை உடைப்பதற்காக கையில் இருந்த ஆயுதத்தினால் அடித்தேன். அப்போது அதை உடைக்காதே என்றதொரு சப்தம் கேட்டது. அதேநேரம் எனது கையில் இருந்த ஆயுதத்தினை அவர் பறித்தும் எடுத்தார், பிரம்பால் என்னை அடிக்கத் தொடங்கினார். தாடியுடன் காணப்பட்ட அவர் நீண்ட வெள்ளை நிற ஆடை அணிந்திருந்தார். பின்னர் அவர் மறைந்துவிட்டார். பார்க்க: சோலை மலர்.

இது  இலங்கையை வந்தடைந்த அருமைத் தோழர்களான ஸஹாபாக்களுடன் தொடர்புபட்ட இடம் என்று சொல்லப்படுகிறது. அதன் அடிப்படையில் இந்தப் பள்ளி வாயில் இலங்கையின் முதல் பள்ளியெனலாம். இதன் அடிப்படையில் இப்பள்ளி வாயில்  1436 ஆண்டுகள் பழமை வாய்ந்த பள்ளியென்பது குறிப்பிடத்தக்கது. 

தொடரும்...

பேருவளை வரலாறு.

பேருவளை வரலாறு.

அல்ஆலிமுல் ஃபாழில் ழிஆவுத்தீன் அல் உஸ்மானீ அல்மஹ்ழரி

கி.பி. 700ல் துருக்கி நாட்டு சுல்தான் ஜமாலுத்தீன் பின் அலாவூத்தீன் என்பவர் பதினொரு தோழர்களுடன் கப்பலொன்றில் சுற்றுலாப் பயணம் மேற்கொண்டிருந்தார். நீண்ட நாட்களாக கடலில் பயணித்துக்கொண்டிருந்த கப்பல் இறுதியாக கரையொதுங்கிய சந்தர்ப்பத்தில் கரையைக் கண்ட மகிழ்ச்சியில் பர்பர் - தரை தரை என்று கூறியிருக்கிறார்கள். பர்பர் என்ற சொல் இன்று பேருவளை என்றாகிட்டது. சுல்தான் ஜமாலுத்தீன் நபித் தோழர் ஸெய்யிதுனா உஸ்மான் ரழியல்லாஹு அன்ஹு அன்னவர்களின் பதினோராவது தலைமுறையில் உள்ள ஒருவராகும்.

சுல்தான் ஜமாலுத்தீன் பேருவலைப் பிரதேசத்தில் தரை இறங்கிய அச்சந்தர்ப்பத்தில் அப்பிரதேச அரசன் வத்ஹிமியின் பாதுகாப்பு பிரிவினர் அவர்களை அழைத்துக்கொண்டு அரசவைக்கு செல்கின்றனர். பேருவளை அரசனுக்கு துருக்கி அரசர் தன்னுடைய நிலைமைகளை விளக்கிய பின்னர் துருக்கிய அரசரை பேருவளை அரசர் அரச மரியாதை செய்து அவர் வீட்டில் தங்குமாறும் கூட வந்தவர்களை மார்க்கப் பணியாற்ற தாம் விரும்பும் பிரதேசம் செல்வதற்கும் அனுமதி வழங்கினார்.

பேருவளை அரசன் வத்ஹிமி தன்னுடைய சகோதரி ஒருவரை துருக்கிய மன்னருக்கு திருமணமும் இஸ்லாமிய முறைப்படி செய்து வைத்தார். உஸ்மான் என்ற ஆண் குழந்தை அத்தம்பதியினருக்குக் கிடைத்தது. இந்த உஸ்மானின் பரம்பரையினர் இன்று வரை பேருவளைப் பிரதேசத்தில் சீரும் சிறப்புடனும் வாழ்ந்து வருகின்றனர். இந்தச் செய்திகள்கூட அப்பரம்பரையினரில் ஒருவரான அல்ஆலிமுல் ஃபாழில் ழிஆவுத்தீன் அல் உஸ்மானீ அல்மஹ்ழரி என்பரிடம் மேற்கொண்ட நேர்காணலில் பெற்றுக் கொள்ளப்பட்ட தென்பது குறிப்பிடத்தக்கது.

துருக்கிய மன்னருக்கு பேருவளை மன்னன் தனது சகோதரி ஒருவரை திருமணம் முடித்துக் கொடுத்த வரலாற்றுப் பின்னணியுடன் மன்னரின் மகள் ஒருவர் இஸ்லாத்தினை தழுவும் வரலாறும் ஆரம்பிக்கிறது. இஸ்லாத்தினை ஏற்றுக்கொண்ட பேருவளை மன்னனின் மகளை இரண்டாவது புவனேகபாகு திருமணம் செய்து கொண்டார். இவர்களுக்குப் பிறந்த அரச குமாரர் குருணாகல் பிரதேச முஸ்லிம் மன்னன் வத்ஹிமி கலே பண்டார என்றழைக்கப்படும் குறைஷான் இஸ்மாயீல் ஆகும். பார்க்க: இலங்கை சோனக வரலாறு.

துருக்கிய மன்னன் ஜமாலுத்தீன் என்பரவால் பேருவளை பிரதேசத்தில் பள்ளிவாயில் ஒன்றும் கட்டப்பட்டது. அது தர்கா நகர் சீனாதுறை ஜும்ஆப் பள்ளிவாசலாகும். இந்தப்பள்ளிவாசல் 1000 ஆயிரம் ஆண்டுகளை பூர்த்தி செய்துகொண்டபோது சோலை மலர் என்ற பெயரில் சஞ்சிகையொன்று வெளியிடப்பட்டது. இதிலும் மேற்குறிப்பிட்ட வரலாற்று நிகழ்வுகள் பதிவாகியிருப்பதைக் காணலாம்.

தொடரும்....

இலங்கை முஸ்லீம்களின் பூர்வீக குடியிருப்பு வரலாற்றுத் தொடர்....

இலங்கையின் முஸ்லிம் மன்னர்.

இரண்டாவது புவனேகபாகுவின் மகன் வத்ஹிமி கலேபண்டார இலங்கையில் ஆட்சி செய்த முஸ்லிம் மன்னனாவார் மன்னன் புவனேகபாகு முஸ்லிம் பெண் ஒருத்தியை மணம் செய்திருந்தார் என்பது பிரபலமான வரலாற்றுச் செய்தி. வத்ஹிமி கலேபண்டாரவின் ஆட்சி கீர்த்தியற்ற கலவரச் சூழல் கொண்ட குறுகிய கால ஆட்சியாக முடிவுற்றது. அரச மந்திரிப் பிரதானிகளும் பிக்குமார்களும் இவர் அரசனானதை விரும்பவில்லை.

மூன்று வருடங்கள் அல்லது ஐந்து வருடங்களுக்கு உட்பட்ட ஒரு சிறிய காலப்பகுதியில் நடந்த அவரது ஆட்சின்போது குருனாகல் எத்துக்கள் மலை உச்சியில் இருந்து அவர் வீழ்த்தப்பட்டு கொலைசெய்யப்பட்டார் இது பிக்குமார்களின் சதித்திட்டத்தின் அடிப்படையில் அரங்கேறியது.

வத்ஹிமி வீழ்ந்து இறந்த மலையடிவாரத்தில் முஸ்லிம்களின் சமய முறைப்படி அவர் அடக்கம் செய்யப்பட்டார். கலேபண்டார அவ்லியா என்ற பெயரில் அவரது அடக்கஸ்தலம் அழைக்கப்பட்டு வருகிறது. அவ்வடக்கஸ்தலம் இன்று வரை முஸ்லிம் குடும்பம் ஒன்றின் தொடர்ச்சியான பராமரிப்பில் இருந்து வருகிறது. முஸ்லிம்கள் மட்டுமன்றி பெருந்தொகையான சிங்கள மக்களும் இங்கு வந்து பிராHத்தனைகளிலும் வழிபாடுகளிலும் ஈடுபடுகின்றனர்.

“வத்ஹிமி கலேபண்டார” போன்ற வார்த்தைப் பிரயோகங்கள் சிங்கள அரச வம்ச பின்னணிக்குரிய பட்டப்பெயர்களாகும். வத்ஹிமி அரசரின் இயற் பெயர் குறைஷான் இஸ்மாயீல் ஆகும். இவரின் தாய் அடக்கம் செய்யப்பட்டுள்ள இடமும் எத்துக்கள் மலைக்கு மிக அருகிலேயே அமைந்துள்ளது. தெல்லியாக்கோனை என்ற பாரம்பரிய முஸ்லிம் கிராமத்தின் மத்தியில் இது காணப்படுகிறது. இவர் அடக்கம் செய்யப்பட்டுள்ள இடம் “ஒற்றை மீசான் கபுறடி” என்று அழைக்கப்படுவதுடன் அதுவும் ஒரு தர்காவாக பராமரிக்கப்பட்டு வருகிறது. இவர் பேருவளை வத்ஹிமி ராஜாவின் மகளாகும்.

தொடரும்....

இலங்கை முஸ்லீம்களின் பூர்வீக குடியிருப்பு வரலாறு. கட்டம் 04

 கட்டம் 04

முதல் மனிதர் ஆதம் அலைஹிஸ்ஸலாம், முதல் நூஹ் அலைஹிஸ்ஸலாம் ,உலகை ஆண்ட இஸ்லாமிய மன்னர்களில் சுலைமான் அலைஹிஸ்ஸலாம் ஆகியோர் பிரசாரம் செய்த அதே ஓறிறைக் கொள்கையினையே அல்லாஹ்வின் இறுதித் தூதர் முஹம்மத் ஸல்லல்லாஹு அலைஹி வஆலிஹி வசல்லம் அவர்களும் பிரசாரம் செய்தார்கள். நாயகம் ஸல்லல்லாஹு அலைஹி வஆலிஹி வசல்லம் அவர்களை நேரில் கண்டு விசுவாசித்தவர்களான ஸஹாபாக்கள் அண்டை நாடுகளுக்கு மார்க்கப் பிரசாரத் தூதுவர்களாக அனுப்பி வைக்கப்பட்டிருக்கின்றார்கள். 

அந்த வகையில் நம் தாய் நாடான இலங்கையும் அருமையான ஸஹாபாப் பெருமக்களின் சிறப்பான பாதங்கள் படும் பாக்கியம் பெற்றிருக்கிறது. அவ்வாறே அந்த அருமைத் தோழர்களைக் கண்ட தாபிஊன்கள்,தபஉத் தாபிஈன்கள் இந்நாட்டில் வாழ்ந்து இறையடி சேர்ந்து நல்லடக்கமும் செய்யப்பட்டிருக்கின்றார்கள். 

ஹிஜ்ரி 135ம் வருடத்தில் அதாவது இற்றைக்கு சுமார் 1300 ஆண்டுகளுக்கு முன்னர் மத்திய மாகாணத்தின் ஹெம்மாதகமவெனும் ஊரில் கண்டு பிடிக்கப்பட்ட சமாதியில் எழுதப்பட்டிருந்த அரப் எழுத்து இதற்கான ஆதாரமாக இருக்கின்றது. ஹிஜ்ரி 3-3-133 என்ற இலக்கங்கள் பொறிக்கப்பட்ட சமாதியொன்றும் மன்னார் பிரதேசங்களில் கண்டெடுக்கப்பட்டுள்ளது.

இலங்கையில் வாழ்ந்து வந்த முஸ்லீம்கள் தமக்கு மார்க்க சட்டதிட்டங்களை கற்றுக்கொடுப்பதற்காக ஒரு போதகரை அனுப்பி வைக்குமாறு அப்பாஸிய கலீபா ஹாரூன் ரஷீதை வேண்டிக்கொண்டபோது அவர் காலித் இப்னு பகாயாவை ஹிஜ்ரி 300களில் இலங்கைக்கு அனுப்பி வைத்தார். அவர் தான் அனுப்பி வைக்கப்பட்ட நோக்கத்தினை சிறப்பாக நிறைவேற்றிய பின் ஹிஜ்ரி 317இல் வபாத்தாகி கொழும்பில் நல்லடக்கம் செய்யப்பட்டார்.

அவரது மண்ணறையில் பதிப்பதற்காக கலீபா ஹாரூன் ரஷீத் அவர்களால் அனுப்பப்பட்ட நடுகல் நம்நாட்டு அரும்பொருட்காட்சிச்சாலையில் உள்ளது. இது போன்ற இன்னும் பல நடுகற்கள் நாட்டின் பல பாகங்களிலிருந்தும் கண்டெடுக்கப்பட்டுள்ளன. அவை இலங்கையில் இஸ்லாம் பரவியதை அறிவிக்கும் சாதனங்களாகவுள்ளன. 

2012-09-15ல் இங்கை முஸ்லிம் சமயஇ பண்பாட்டலுவல்கள் திணைக்களத்தினால் வெளியிடப்பட்ட “அல்ஆலிம் முதவஸ்ஸிதா மற்றும் அல்ஆலிம் ஸானவிய்யா பரீட்சைகளுக்கான பிரமானங்களும் திருத்தியமைக்கப்பட்ட பாடத்திட்டங்களும்” என்ற நூலின் 35ம் பக்கத்தில் இவ்விடயம் பதிவாகியுள்ளது. 

இறைத் தூதர் ஸல்லல்லாஹு அலைஹி வஆலிஹி வசல்லம் அவர்களின் கடிதத்தினை எடுத்துக்கொண்டு இலங்கையை வந்தடைந்த நபித் தோழர் ஹழ்ரத் வஹ்ப் இப்னு ஹப்ஸ் ரழியல்லாஹு அன்ஹு அன்னவர்கள் இலங்கையில் பல வருடங்கள் தம்மார்க்கத்தினைப் பரப்பியதாகவும் இறையில்லங்களை கட்டிக்கொண்டதாகவும் வரலாறு பதிவாகியுள்ளது. பார்க்க: இலங்கை முஸ்லிம்களின் வரலாறும் கலாசாரமும் - எம்.ஐ.எம்.அமீன்.

 தொடரும்...........

இலங்கை முஸ்லிம்களின் பூர்விக குடியிருப்பு வரலாறும் கலாசாரமும்.

بسم الله الرحمن الرحيم

அன்பார்ந்த உலமாக்களே! புத்திஜீவிகளே! மாணவர்களே! பொதுமக்களே!

அஸ்ஸலாமு அலைக்கும் வரஹ்மதுல்லாஹி வபரகாதுஹு

இலங்கை முஸ்லீம்களின் பூர்வீக குடியிருப்பு வரலாறு.

 கட்டம் 01

இஸ்லாத்தின் பார்வையில் உலகத்திலுள்ள ஒட்டு மொத்த மனித இனமும் ஆதம் ஹவ்வா (அலைஹிமஸ்ஸலாம்) ஆகிய இருவரின் வழித்தோன்றல்களாகும். இவ்விருவரும் உருவ மற்ற ஓரிறைக் கொள்கையுடையவர்களாகும். இதில் ஆதம் (அலைஹிஸ்ஸலாம்) இலங்கை யராகவும் ஹவ்வா (அலைஹஸ்ஸலாம்) சவூதி அரேபியாவைச் சேர்ந்தவராகவும் இருக் கின்றார்கள். இவ்விருவருக்கும் பிறந்த பிள்ளைகளிடத்தில் காலப்போக்கில் ஓரிறைக் கொள்கை ஒழிக்கப்பட்டு உருவ வழிபாடென்னும் சிலை வணக்கம் தோற்றம் பெறு கிறது. நெருப்பு வணக்கமும் உருவாகிறது. இதனால் நூஹ் (அலைஹிஸ்ஸலாம்) என்ற ஒருவர் தூதுவராக அவர்களுக்கு அனுப்பி வைக்கப்படுகிறார்......

கட்டம் 02

இவர், ஓரிறைவனை வணங்குமாறு சுமார் 950 வருடங்கள் உலக மக்களை அழைத்திருக்கிறார். ஆனாலும் அவரை ஒருசிலர்தான் ஏற்றுக்கொண்டனர். உருவ வழிபாட்டில் இருந்து அவரின் புதல்வரும் விடுபடவில்லையென்றால் எந்தளவுக்கு அன்றிருந்த மக்கள் மத்தியில் அவ்வழிபாடு புரையோடிப்போய் இருந்திருக்கும் என்று யோசித்துப் பாருங்கள். அவரை ஏற்றுக்கொள்ளாத காரணத்தினால் அவரை விசுவாசித்தவர்களைத் தவிரவுள்ள முழு மனித இனமும் பாரிய வெள்ளப் பிரளயத்தினால் அழிக்கப்படுகின்றனர். இந்தப் பிரளயத்தினை அடுத்து ஆதம் ஹவ்வா (அலைஹிமஸ்ஸலாம்) அவர்களினூடாக வெளிப்பட்ட மனித இனம், நபி நூஹ் அலைஹிஸ்ஸலாம் அவர்களுடைய பிள்ளைகளின் வாரிசுகளாக மாற்றம் பெற்றது. இது அரப் தேசத்தில் இருந்து புறப்பட்டது.

முதல் கட்ட மனித பெருக்கத்திற்கு நம் நாடான இலங்கையும் சவூதி அரேபியாவும் சம்பந்தம் இருப்பதை மறுக்க முடியாததுபோன்று இரண்டாம் கட்ட மனித வளர்ச்சிக்கு அரப் நாடு ஒன்றுதான் அதற்கு சம்பந்தப்பட்டதென்பதை மறுக்க முடியாதுள்ளது. ஆக இன்றைய மொத்த மனித இனம் இஸ்லாமியர்களுக்குப் பிறந்தவர்கள் மட்டுமல்லாது அரப் தேசத்தில் இருந்து உருவானவர்கள் என்பதுமே யதார்த்தமாகும்.

 கட்டம் 03

இலங்கையின் வரலாற்றுக்கு முற்பட்ட காலப்பகுதிகளில் யக்ஷ, நாக, தேவ இனத்தினர் வாழ்ந்து வந்ததாக இலங்கையின் வரலாற்றுத் தொகுப்பு நூலான மஹாவம்சம் கூறுகிறது. இவர்கள் பிறநாட்டில் இருந்து வந்தவர்கள். இந்நாட்டின் பழங்குடி மக்களாக கருதப்படுகின்ற இவ்வினத்தினர்கள்தான் காலப்போக்கில் தாம் விரும்பிய மதங்களைப் பின்பற்றியுள்ளனர். ஆக இந்த நாட்டின் இன்றைய முழு மனிதர்கள் மட்டுமல்லாது மதங்களும் பிற நாட்டில் இருந்து வந்தவைகளே.
இலங்கை நாட்டின் தொன்மையான குடியிருப்புக்களில் புத்தள மாவட்டமும் ஒன்றாகும். இலங்கையில் பௌத்த மதத்திற்கு வித்திட்ட விஜயனின் வருகைக்கு முன்னரே நாகரிகம் நிறைந்து கட்டுக்கோப்பான சமுதாய அமைப்பொன்று இப்பகுதியில் நிலவியிருக்கிறது. இது யக்ஷயர்களின் தேசம் என்று சொல்லப்படுமளவுக்கு விஜயனின் வருகைக்கு முன்னர் யக்ஷயர்கள் ஆட்சி இப்பிரதேசங்களில் இடம் பெற்றதாக வரலாறுகள் சொல்கிறது. விஜயனின் ஒழுக்கமற்ற செயல்பாட்டினால் அவன் அவனது தந்தையினால் நாடுகடத்தப்பட்டிருந்தான். இவனே இலங்கையில் புத்தமதத்தை தோற்றுவித்தான்.

விஜயன் புத்தளக் கரையோரத்தினை கி.மு.544ல் வந்தடைகின்றான். ஆனால் கி.மு.326-327களில் இலங்கையின் புவியியல் படத்தை வரைந்த கிரேக்க மாலுமியான ஓனோஸ் கிறிட்டோஸ் இன்றைய புத்தளம் மற்றும் அதைச்சுற்றியுள்ள பாகத்துடன் தொடர்பான பகுதிகளில் “சோனாள்கள்” குடியேற்றம் பற்றிக் குறிப்பிட்டுள்ளார். விஜயன் இலங்கையில் பிரவேசிக்கும் முன்னர் இது நடைபெற்றுள்ளது.

அநுராதபுர நகரம் பராக்கிரமபாகு காலத்தில் (கி.மு.437-407) யோனகர்களுக்கென தனியான பகுதி என ஒதுக்கப்பட்டிருந்ததாக இலக்கியத் தரவுகள் குறிப்பிடுகிறன. சிங்களவர்கள் முஸ்லிம்களை “யொன்னு” என்றும் தமிழர்கள் “யோனகர்” என்றும் அழைத்துள்ளனர். இதுவே “சோனகர்” என்றும் சொல்லப்படுகிறது. இவர்கள்தான் அன்றைய யக்ஷயர்கள். இன்றைய இஸ்லாமியர்கள்.

தெதுரு ஓயா, சோனா நதி அல்லது அரேபியர் நதி என்று கூறப்படுகிறது. தெதுரு ஓயாவிற்கு வடபாகத்தில் சோனாள்கள் வாழ்ந்துள்ளனர்.

இலங்கையின் புத்தளம் பிரதேசத்தில் விஜயனும் அவனது தோழர்களும் கரையொதுங்கிய சந்தர்ப்பத்தில் இப்பிரதேசத்தில் நல்லாட்சி புரிந்துவந்த யோனர்களான யக்ஷயர்கள் சோனகர்கள் என்று இன்றும் அழைக்கப்படுகின்றனர்.

கி.மு. 985-932 காலத்தில் வாழ்ந்த மன்னர்களில் ஒருவர் நபியுல்லாஹ் சுலைமான் அலைஹிஸ்ஸலாம் அவர்களாகும். அல்லாஹ் காற்றை இவர்களின் கைவசமாக்கினான். விலங்கினங்கள், பூச்சி புழுக்கள் ஆகியவற்றின் மொழிகளையெல்லாம் இவர்களுக்கு கற்றுக்கொடுத்து அவற்றையூம் இவர்களின் ஆதிபத்தியத்தின் கீழ் அல்லாஹ் ஆக்கினான். ஜின்களும் இவர்களுக்கு வசப்படுத்திக்கொடுக்கப்பட்டது.

இவர் முழு உலகத்தினையும் ஆட்சி செய்திருக்கின்றார் என்ற அடிப்படையில் இலங்கைக்கும் இவர் வந்திருக்கவேண்டும். அவ்வாறு இலங்கைக்கு வந்தபோது சாம்பிராணி, மாணிக்கக்கற்கள், கருங்காலி, யானைத் தந்தம், மயில் முதலியவற்றை இங்கிருந்து பெற்றுச் சென்றுள்ளனர்.

காலி பழமை மிக்கதொரு நகர். இலங்கையில் பழைய தலை நகரங்களான அநுராதபுரம், பொலன்னறுவை, தம்புள்ளை, யாப்பாகுவ, சீகிரிய ஆகிய இடங்களைவிட ஆயிரம் வருடங்கள் பழைமை மிக்க நகரம். இங்கிருந்துதான் இலங்கையின் வரலாறு ஆரம்பிக்கின்றது.

நபியுல்லாஹ் சுலைமான் அலைஹிஸ்ஸலாம் அவஉகள் ஜெரூஸலத்தில் கட்டிய அரண்மனைக்கு காலி துறை முகத்தினூடாக அரேபிய வணிகர்கள் பெறுமதிமிக்க இரத்தினக் கற்கள் கொண்டு செல்லப்பட்ட வரலாற்றுத் தகவல் 13-08-1989 அன்று காலி தலாப்பிடியா முஹ்யித்தின் ஜும்ஆ மஸ்ஜிதில் வெளியிடப்பட்ட சோலை மலர் சுமந்துள்ளதுடன் புத்தளம் முஸ்லிம்கள் வரலாறு, காத்தான்குடி வரலாறு போன்ற பல வரலாற்று நூற்களில் பதிவாகியுள்ளது.

இந்தியா கேரள மலையாளக் கரைப் பகுதிகளில் நபியுல்லாஹ் சுலைமான் அலைஹிஸ்ஸலாம் அவர்களின் கப்பல்கள் வந்து சென்றுள்ளதாக மானா மக்கீன் என்பவர் குறிப்பிடுகிறார். பார்க்க: வரலாற்றில் இலங்கை கண்ட குமரி பக்கம் 19.

இலங்கையில் அரேபியர்களுடைய வர்த்தகத் தொடர்பு, சிங்கள மக்களுடன் கொண்டிருந்த அவர்களது உறவு, மன்னர்களிடம் அவர்களுக்கிருந்த செல்வாக்கு பரவலாக இலங்கையில் அவர்களால் மேற்கொள்ளப்பட்ட குடியேற்றங்கள் காரணமாகத்தான் டெனன்ட் (கிறிஸ்துவ சக்தியொன்று  இலங்கைக்கு வராதிருந்தால் பிரித்தானியர் கைக்குள் அது வந்திருக்காது அது அரேபியர்களால் ஆளப்படும் ஒரு முஸ்லிம் நாடாக மாறியிருக்கும்) என்று குறிப்பிடுகிறார். பார்க்க: காத்தான்குடி வரலாறு பக்கம் 11.
இது இந்நாட்டு முஸ்லீம்களின் குடியிருப்புப் பூர்வீக வரலாறாகும். இந்த வரலாறு இன்று நம்மில் எத்தனை பேர்களுக்குத் தெரியும்? அவ்வாறு தெரிந்து கொண்டவர்களில் இதனை ஏற்றுக்கொண்டவர்களைவிட நிராகரித்து பொய்பிப்பவர்கள்தான் அநேகர்களாக இருக்கின்றனர்.

தொடரும்....

அல்லாஹ்வின் அத்தாட்சிகள்

அல்லாஹ்வின் அத்தாட்சிகள்

ولنجعله آية للناس ورحمة منا. مريم 21

“அவரை (ஹழ்ரத் நபி ஈசா அலைஹிஸ்ஸலாம் அவர்களை) மக்களுக்கு ஓர் அத்தாட்சியாகவும் நம்முடைய அருளாகவும் நாம் ஆக்குவதற்காகவே (இவ்வாறு செய்துள்ளோம்.)” இவ்வசனம் நபி ஈசாவை அல்லாஹ்வின் அத்தாட்சி எனக் கூறுகிறது. மர்யம் 21

وانظر إلى حمارك ولنجعلك آية. البقرة 259

“உமது கழுதையையும் பார்ப்பீராக! என்றான். மனிதர்களுக்கு உம்மை அத்தாட்சியாக ஆக்குவதற்காக (நாம் இவ்வாறு செய்தோம்).” அல்பகரா 259. இவ்வசனம் நபி உஸைர் அவர்களை அல்லாஹ்வின் அத்தாட்சி எனக் கூறுகிறது.

أم حسبت أن أصحاب الكهف والرقيم كانوا من آياتنا عجبا. الكهف 9

“நிச்சயமாக குகைவாசிகளும் ஏட்டையுடையோரும் நமது அத்தாட்சிகளில் ஆச்சரியத்திற்குரியோராக இருந்தனர் என (நபியே) நீங்கள் எண்ணுகிறீர்களா?.”அல்கஹ்ஃப் 9 இவ்வசனம் குகைவாசிகளான வலிமார்களை அல்லாஹ்வின் அதிசயமான அத்தாட்சி எனக் கூறுகிறது.

وجعلناها وابنها آية للعالمين.الانبياء 91

“மேலும் அவரையும் அவரது மகனையும் அகிலத்தார்களுக்கு அத்தாட்சியாக்கினோம்.”அல்அந்பியா 91. இவ்வசனம் நபி ஈசாவையும் அவரது தாயான மர்யமையும் அல்லாஹ்வின் அத்தாட்சி எனக் கூறுகிறது.

فيه آيات بينات مقام ابراهيم

“அதில் தெளிவான அத்தாட்சிகளும் மகாமு இப்ராஹீமும் இருக்கிறது.”ஆல இம்ரான் 97. இவ்வசனம் கஃபாவில் பல தெளிவான அத்தாட்சிகள் இருப்பதாக அறிவித்துவிட்டு அதில் ஒன்றாக நபி இப்ராஹீம் அலைஹிஸ்ஸலாம் அவர்களின் பாதச் சுவடுகள் பதிவாகியுள்ள கல்லை அல்லாஹ்வின் தெளிவான அத்தாட்சி எனக் கூறுகிறது.

وقال لهم نبيهم إن آية ملكه. البقرة 248

“நிச்சயமாக அவரது ஆட்சிக்கான அத்தாட்சியானது வானவர்கள் சுமந்து வரும் பேழை உங்களிடம் வருவதாகும்.”அல்பகரா 248. இவ்வசனம் நபி மூசா மற்றம் ஹாரூன் அலைஹிமஸ்ஸலாம் ஆகிய இருவரின் பாதணிகள், கைத்தடி, தலைப்பாகை போன்ற இன்னும் பல பொருட்களை உள்ளடடிக்கிய ஒரு பெட்டியை அல்லாஹ்வின் அத்தாட்சி எனக் கூறுகிறது.

قال رب اجعل لى آية قال آيتك أن لا تكلم الناس ثلاثة أيام إلا رمزا. آل عمران 41

“என் இரட்சகனே! எனக்கு ஒரு அடையாளத்தை ஏற்படுத்துவாயாக! என்று அவர் கேட்டார். அதற்கு மூன்று நாட்கள் சைகை மூலமாகவே தவிர மனிதர்களுடன் நீர் பேசாமல் இருப்பதே உமக்குரிய அத்தாட்சியாகும் என (அல்லாஹ்) கூறினான்.”ஆல இம்ரான் 41. இவ்வசனம் மூன்று நாட்கள் பேசாமல் இருப்பதை அல்லாஹ்வின் அத்தாட்சி எனக் கூறுகிறது.

ولقد آتينا موسى تسع آيات بينات. بني إسرائيل 101

“நிச்சயமாக நாம் மூசாவுக்கு தெளிவான ஒன்பது அத்தாட்சிகளை வழங்கினோம்.”பனூ இஸ்ராயீல் வசனம் 101. இவ்வசனம் நபியவர்களின் கை, தடி, நாவு, கடல், வெள்ளம், வெட்டுக் கிளி, பேன், தவளை, இரத்தம் ஆகியவைகளை அல்லாஹ்வின் அத்தாட்சி எனக் கூறுகிறது.

هذه ناقة الله لكم آية. الأعراف 73

“இந்த அல்லாஹ்வின் ஒட்டகம் உங்களுக்கு அல்லாஹ்வின் அத்தாட்சியாகும்.”அல்அஃராப் வசனம் 73. இவ்வசனம் ஒட்டகத்தை அல்லாஹ்வின் அத்தாட்சி எனக் கூறுகிறது.

إن الصفا والمروة من شعائر الله.البقرة158

“நிச்சயமாக ஸபாவும் மர்வாவும் அல்லாஹ்வின் சின்னங்களாகும்.”அல்பகரா வசனம் 158. இவ்வசனம் ஸபா மற்றும் மர்வா எனும் மலைக் குன்றுகளை அல்லாஹ்வின் சின்னம் எனக் கூறுகிறது.

والبدن جعلناها لكم من شعائر الله. الحج 36

“குர்பானிகளுக்கான மாடு மற்றும் ஒட்டகங்களை அல்லாஹ்வின் அடையாளச் சின்னங்களில் உள்ளவைகளாக உங்களுக்கு நாம் ஆக்கினோம்.”அல்ஹஜ் வசனம் 36. இவ்வசனம் ஆடு, மாடு, ஒட்டகங்களை அல்லாஹ்வின் சின்னங்கள் எனக் கூறுகிறது.

  لم يكن الذين كفروا من أهل الكتاب والمشركين منفكين حتى تأتيهم البينة رسول من الله. البينة1-2

“வேதத்துடையவர்களிலும் இணை வைப்பாளர்களிலும் எவர்கள் நிராகரித்தார்களோ அவர்கள் தம்மிடம் தெளிவான அத்தாட்சி வரும் வரை (நிராகரிப்பை விட்டும்) விலகுபவர்களாக இருக்கவில்லை. (அவ்வத்தாட்சி) அல்லாஹ்வின் தூதராகும்.” அல்பய்யினா வசனம் 1-2. இவ்வசனம் நமது நாயகம் முஜ்தபா ஸல்லல்லாஹு அலைஹி வஆலிஹி வசல்லம் அவர்களை அல்லாஹ்வின் தெளிவான அத்தாட்சி எனக் கூறுகிறது.

இவ்வாறு இன்னும் எத்தனையோ வஸ்துக்களை தனது அத்தாட்சி என அல்லாஹ் சொல்வதை திருமறையில் நாம் காணலாம். ஆதலால் மேற்கண்டவற்றைக் கொண்டு அத்தாட்சி என்றால் என்ன என்பதை தெளிவாக புரிந்திருப்பீர்கள் என நினைக்கின்றொம். 

அத்தாட்சி என்றால் என்னவென்பதற்கு இதுவரையில் பதிவு செய்யப்பட்ட ஆதாரங்களை உற்று நோக்குவீர்களாக இருந்தால் அவற்றில் இரண்டு வசனங்களில் இரண்டு பொருட்கள் குறித்துப் பேசும் போது அவை தெளிவான அத்தாட்சிகள் என்று கூறியதைப் படித்தீர்கள். ஒன்று மகாமு இப்ராஹீமாகும். மற்றது நமது நாயகம் ஸல்லல்லாஹு அலைஹி வஆலி வசல்லம் அவர்களாகும்.

தெளிவான இவ்விரு அத்தாட்சிகளில் ஒன்றான மகாமு இப்ராஹீம் குறித்துப் பேசும் போது அந்த இடத்தை நபித் தோழர் ஸெய்யிதுனா உமர் ரழியல்லாஹு அன்ஹு அவர்களின் ஆலோசனையின் அடிப்படையில் ஸல்லல்லாஹு அலைஹி வஆலிஹி வசல்லம் அவர்களும் தோழர்களும் தொழும் இடமாக எடுத்துக் கொண்டதாக அல் குர்ஆன் சொன்னது. இது உங்கள் ஞாபகத்தில் இருக்கும் என நினைக்கின்றொம்

மகாமு இப்ராஹீம் என்ற தெளிவான அத்தாட்சி இருக்கும் இடம் அல்லாஹ்வின் மாளிகையில் பாதுகாக்கப்பட்டு அவ்விடத்தில் தொழுது கொள்வதும் ஸுன்னத்தான அமலாக இருக்கிறது என்பதை அடிப்படையாக வைத்து எந்தப் பொருட்களெல்லாம் அல்லாஹ்வின் அத்தாட்சிகளாக இருப்பதாக அடையாளம் காணப்படுமோ அவை அனைத்தும் பாதுகாக்கப்பட வேண்டும். அவை யாவும் கண்ணியப்படுத்தப்பட வேண்டும் என்று அல்லாஹ்வின் அருளைச் சுமந்த அஹ்லுஸ் ஸுன்னத் வல்ஜமாஅத் அறிஞர்கள் அறிவுறுத்திக் கொண்டிருக்கின்றார்கள்.

எனவே, நமது நாயகம் ஸல்லல்லாஹு அலைஹி வஆலிஹி வசல்லம் அவர்கள் அல்லாஹ்வின் பிரதான சின்னமாகவும் அவனின் பிரதான மிக முக்கிய அத்தாட்சியாகவும் இருக்கின்றார்கள். இதனடிப்படையில் அவர்களும் அவர்களது பொருட்களும் பாதுகாகக்கப்படல் வேண்டும். அவை யாவும் கௌரவிக்கப்படல் வேண்டும். இதனடிப்படையில்தான் நபித் தோழர்கள் தொடக்கம் இன்று வரையுள்ள அஹ்லுஸ் ஸுன்னத் வல் ஜமாஅத் கொள்கைவாதிகள் நபிமார் மற்றும் ஸாலிஹீன்களின் சகல வஸ்துக்களையும் சங்கைப்படுத்தி வருதைப் பார்க்கலாம். இது தக்வாகும்.

عن عبد الله بن عمر رضي الله عنهما قال رأيت رسول الله صلى الله عليه وآله وسلم يطوف بالكعبة ويقول ما أطيبك وأطيب ريحك ما أعظمك وأعظم حرمتك والذي نفس محمد بيده لحرمة المؤمن اعظم عند الله حرمة منك ماله ودمه وان نظن به إلى خيرا

கஃபாவை விட ஒரு முஃமின் அல்லாஹ்விடத்தில் மிகவும் கண்ணியம் பொருந்தியவன் என்று இந்த நபி மொழி சொல்லிக் கொண்டிருக்கிறது.

எனவே கஃபா கண்ணியமானது என்பதற்காக அதனோடு தொடர்புள்ள சகல பொருட்களையும் சங்கை செய்திட முன்னிற்கும் நாம் அந்த கஃபாவை விட கண்ணியம் பொருந்திய முஃமினுடன் தொடர்புள்ள பொருட்களை கண்ணியப்படுத்தி வைப்பதில் நம்மத்தியில் கவணக் குறைவு ஏற்பட்டது எதனால்? என்று சிந்தியுங்கள்.

கஃபத்துல்லாஹ்வும் அதனைச் சூழவுள்ள பிரதேசங்களும் பரிசுத்த புண்ணிய பூமிகளாகும். அப்பகுதிகள் அல்லாஹ்வின் சின்னங்களாகும். அவை பாக்கியம் நிறைந்த பிரதேசங்களாகும். எனவே அவை கண்ணியப்படுத்தப்படவேண்டும் என்பதில் மாற்றுக் கருத்தில்லை.

கஃபதுல்லாஹ்இ ஹஜருல் அஸ்வத்இ நபிய்யுல்லாஹ் இப்ராஹீம் அலைஹிஸ்ஸலாம் அவர்களின் பாதச் சுவடு என்பனபோன்று மதீனா முனவ்வராவும் அதனைச் சூழவுள்ள பிரதேசங்களும் ஆகும். இருந்த போதிலும் அங்குள்ள மா நபி ஸல்லல்லாஹு அலைஹி வஆலிஹி வசல்லம் அவர்களின் மண்ணறையை ஏன் நம்மவர்கள் கண்ணியப்படுத்துகின்றார்களில்லை. மாறாக நபிமார் மற்றும் வலிமார்களின் கப்ருகளை கண்ணியப்படுத்தும் போது அதனைச் சிலர் மிக மோசமாகச் சித்திரிக்கின்றார்கள்.

மதீனா மக்காவை விட அதிகம் பரகத் உள்ள இடம்.

عن أنس رضي الله عنه عن النبي صلى الله عليه وآله وسلم اللهم اجعل بالمدينة ضعفي ما جعلت بمكة من البركة. البخاري

மதீனா மக்காவை விட மதிக்கப்பட வேண்டும்.

عن أم المؤمنين عائشة رضي الله تعالى عنها قالت قال رسول الله صلى الله عليه وآله وسلم اللهم حبب إلينا المدينة كحبنا مكة أو أشد. البخاري ومسلم.

மக்கா முகர்ரமாவில் புனித ஆலயத்தினை கட்டி முடித்த பின்னர் அந்த ஊரைப் பரிசுத்தமான ஊராக ஆக்கிவிடுமாறு நபிய்யுல்லாஹ் இப்ராஹீம் அலைஹிஸ்ஸலாம் அவர்கள் பிரார்த்தித்திருக்கின்றார்கள். அவ்வாறே மதீனா முனவ்வறாவில் மஸ்ஜிதுந் நபவியை கட்டி முடித்துவிட்டு அந்த ஊரை பரிசுத்தமான ஊராக பிரகடணம் செய்தது மட்டுமல்லாமல் மக்கா எங்களுக்கு நேசம் உள்ளதொரு பிரதேசமாக இருப்பது போன்று அல்லது அதை விட அதிகம் நேசம் உள்ளதொரு பிரதேசமாக மதீனாவை ஆக்கி விடு என்று நமது நாயகம் ஸல்லல்லாஹு அலைஹி வஆலிஹி வசல்லம் அவர்கள் அல்லாஹ்விடம் பிரார்த்தனை செய்துள்ளார்கள். அவ்வாறான மதீனா முனவ்வராவையும் அதனோடு தொடர்புள்ளவைகளையும் நாம் நேசிப்பதோடு அவற்றினூடாக அருள் பெற்றிட முயற்சிப்போமாக! எனக் கூறி  இக்கட்டுரையை முடித்துக் கொள்கின்றோம்.

யா அல்லாஹ் உனது பேருளான பெருமானார் ஸல்லல்லாஹு அலைஹி வஆலிஹி வசல்லம் அவர்களின் பெருமைகளையும் அகமியங்களையும் சொல்வதற்கும் எழுதுவதற்கும் உடலிலும் உள்ளத்திலும் முழுமையான ஆரோக்கியத்தினைத் தந்தருள்வாயாக! அகத்திலும் புறத்திலும் உண்டாகும் சகல வியாதிகளை விட்டும் எம்மனைவரையும் பாதுகாப்பாயாக!

பேரருளான பெருமானார் ஸல்லல்லாஹு அலைஹி வஆலிஹி வசல்லம் அவர்களின் பொருட்டினால் எமது இப்பணியை ஏற்றுக் கொள்வாயாக! எமது பெற்றோர்கள் உற்றார் உறவினர்கள் முஹிப்பீன்கள் மனைவி மக்களின் பாவங்களை மன்னித்து அவர்கள் எல்லோரின் மண்ணறைகளையும் மன்னர் மஹ்மூதரசர் ஸல்லல்லாஹு அலைஹி வஆலிஹி வசல்லம் அவர்களின் மனம் கமழும் கப்ருகளாக அமைத்துவிடுவாயாக!

விழிப்பிலும் உறக்கத்திலும் உன் ஹபீபின் உயர் சிந்தனையை எங்களில் ஏற்படுத்துவாயாக! அதன் வழியே எமது குழந்தைகளும் மாணவ மாணவிகளும் பயணிப்பதற்கு பெருமானார் ஸல்லல்லாஹு அலைஹி வஆலிஹி வசல்லம் அவர்களின் பொருட்டினால் தௌபீக் செய்தருள் புரிவாயாக! ஆமீன் பிஜாஹி ஸெய்யிதில் ஆலமீன் ஸல்லல்லாஹு அலைஹி வஆலிஹி வசல்லம்.

اللهم نور بالعلم قلوبنا واستعمل بطاعتك أبداننا وخلص من الفتن أسرارنا واشغل بالإعتبار أفكارنا وقنا شر وساوس الشيطان واجرنا من النيران. اللهم اعصمنا من شر الفتن وعافنا من جميع المحن وأصلح منا ما ظهر وما بطن ونق قلوبنا من الحقد والحسد ولا تجعلنا علينا تباعة لأحد. اللهم يا رب بجاه نبيك المصطفى ورسولك المرتضى طهر قلوبنا من كل وصف يباعدنا عن مشاهدتك ومحبتك وامتنا على عقيدة أهل السنة والجماعة والشوق إلى لقائك ياذاالجلال والإكرام والحمد لله رب العالمين                             

صلى الله على محمد

صلى الله عليه وسلم

صلى الله على محمد

صلى الله عليه وسلم

صلى الله على محمد

يارب صل عليه وسلم

 முற்றும்

தொகுப்பசிரியர்

அல் ஹாஜ் மௌலவி பஸீர் அஹ்மத்

அதிபர் 

அந்  நிலாமிய்யதுல் மஹ்பிய்யா அரபுக் கால்லூரி